Хэргийн талаар тодруулбал, Ховд аймгийн Булган сумын харьяат Б.Мөнхтөр гэгч гадаадын хоёр ч хөрөнгө оруулагч компанийг залилж, мөн монгол иргэнийг татан оролцуулж ноцтой хэмжээний хохирол учруулаад байгаа аж. Ингэхдээ өөрийн үеэл ахынхаа компанийг ашигласан ба өдгөө гадаадын иргэдээс гадна түүний үеэл ах, нэр бүхий монгол иргэд их хэмжээний хохирол амсаад байгаа юм. Хохирсон иргэдийн  нэг нь иргэн Д.Цоггэрэл бөгөөд Б.Мөнхтөр нь түүний үүсгэн байгуулсан компанийг өөрт нь мэдэгдэлгүй бэлэглэлийн гэрээгээр 95 хүртэлх хувийг нь авч, хуурамч гарын үсэгтэй худалдах, худалдан авах гэрээг хүртэл хийсэн байдаг.

Улмаар гадаадын хөрөнгө оруулагчдыг айлган сүрдүүлэх маягаар ажлаа үргэлжлүүлж,  хууль хяналтын байгууллагынхантай үгсэн хуйвалдаж, Гадаадын иргэн, харьяатын газраар ажлыг нь хүртэл зогсоогоод авчээ. Эх сурвалжийн мэдээллээр, прокурорууд эл хэргийг шалгах явцдаа мэргэжлийн болон ёсзүйн ноцтой зөрчлүүд гаргасан байна. Тэр утгаараа хэргийг удаашруулж, буруутай этгээдэд ял завших нөхцлийг бүрдүүлсэн гэдэг үндэслэлээр нэр бүхий алба хаагчид хуулийн байгууллагад шалгуулж эхэлжээ.

Гурван жил хууль шүүхийнхний ширээний нүдэнд “таг мартагдсан” эл хэргийг ч ХЗДХ-ийн сайд Х.Нямбаатар болон ажлын хэсгийнхэн анхааралдаа авч, бусдыг хохироосон этгээдэд хариуцлага тооцох цаг нь болсон гэж харж байна.