Засгийн газрын ээлжит хуралдааны шийдвэрийг танилцууллаа. 

Засгийн Газрын Хэрэг Эрхлэх Газрын дарга Д.Амарбаясгалан "Эрдэнэс Тавантолгой” ХК дээр онцгой дэглэм тогтоох асуудлыг Засгийн газраас ярилцаж, шийдвэрлэлээ. Дэглэм тогтоох нөхцөл байдал Монгол Улсын Засгийн газрын аравдугаар сарын 5-ны өдрийн хуралдаанаас гарсан 362  дугаар тогтоолын хэрэгжилтийг хангах зорилготой. Монгол Улсын хувьд төлбөрийн тэнцэлтэй холбоотойгоор валютын нөөцийг нэмэгдүүлэх, онцгой арга хэмжээ авах үүрэг чиглэл өгөгдсөн. Иймээс “Эрдэнэс Тавантолгой” ХК-нд энэ оны төгсгөл гэхэд 500 сая долларыг татан төвлөрүүлэх, “Эрдэнэт” үйлдвэрт 300 сая ам.долларыг төвлөрүүлэх үүрэг чиглэл өгөгдсөн. Мөн уул уурхайн бусад компаниудад борлуулалт хийсэн уул уурхайн бүтээгдэхүүнийхээ мөнгийг татан төвлөрүүлж оруулж ирэх үүргийг өгсөн байгаа. 

Компанийг Сангийн яамны төрийн  нарийн бичгийн дарга Ж.Ганбат бүрэн төлөөлж, томилогдон ажиллана” гэв. 

Монгол Улсын Засгийн газрын тогтоол

1. Төлбөрийн тэнцэл алдагдал байгаа өнөөгийн нөхцөлд гадаад валютын орох урсгалыг нэмэгдүүлж, Засгийн газрын 2022 оны 362 дугаар тогтоолыг хэрэгжүүлэх зайлшгүй шаардлагыг харгалзан "Эрдэнэс Тавантолгой" ХК-д зургаан сарын хугацаагаар онцгой дэглэм тогтоосугай. 

2. "Эрдэнэс Тавантолгой" ХК-д тогтоосон онцгой дэглэмийн хугацаанд Монгол Улсын Засгийн газарт эрх олгох тухай хууль, энэ тогтоолд заасан арга хэмжээг авч хэрэгжүүлэн, компанийн үндсэн үйл ажиллагаа, удирдлага зохион байгуулалт, төлбөр тооцоог сайжруулж, орлогыг нэмэгдүүлэх асуудлыг шууд хариуцан гүйцэтгэж компанийн бүрэн төлөөлөх эрх бүхий Засгийн газрын онцгой бүрэн эрхэт төлөөлөгчөөр Сангийн яамны төрийн нарийн бичгийн дарга Ж.Ганбатыг томилон ажлуулсугай. 

3. Онцгой дэглэмийн хугацаанд "Эрдэнэс Тавантолгой" ХК-ийн үйлдвэрлэлийн үндсэн үйл ажиллагааг хэвийн нөхцөл байдлыг бүрэн хангаж дор дурдсан арга хэмжээг авч хэрэгжүүлэхийг дараах албан тушаалтанд даалгасугай.

3/1- Компанийн бүтэц зохион байгуулалты оновчтой тогтоож, шинэчлэх. Шаардлагатай бол нэгжийн удирдлага холбогдох албан тушаалтныг томилж, чөлөөлөхийг Засгийн газрын онцгой бүрэн эрхэт төлөөлөгч Ж.Ганбатад. 

3/2-Хөдөлмөрийн болон үйлдвэрлэл, технологийн тухайлсан дүрэм үйлдвэрлэлийн аюулгүй осол ажиллагааны тусгай дүрэм тогтоож тэдгээрийг зөрчигчдөд зохих хариуцлага хүлээлгэж ажиллахыг Засгийн газрын онцгой бүрэн эрхэт төлөөлөгч Ж.Ганбатад.

3/3-Тавантолгой нүүрсний ордоос нүүрс ачих, тээвэрлэх, худалдан борлуулах, хил нэвтрүүлэх бүхий л үйл ажиллагаанд хяналтыг сайжруулах арга хэмжээг тухай бүрт нь авч хэрэгжүүлэхийг Засгийн газрын онцгой бүрэн эрхэт төлөөлөгч Ж.Ганбатад. Энэ чиглэлээр бүх талын дэмжлэг туслалцааг үзүүлж ажиллахыг Засгийн газрын холбогдох гишүүдэд.

3/4-Компанийн хөрөнгө оруулалт, бизнес төлөвлөгөөнд заасан зорилт, арга хэмжээний хэрэгжилт, санхүүгийн иж бүрэн хамтарсан хяналт шалгалтыг хийж дүнг Засгийн газрын үйл ажилагаанд танилцуулахыг Сангийн сайд Б.Жавхлан, Эдийн засаг, хөгжлийн сайд Ч.Хүрэлбаатар, УУХҮ-ийн сайд Ж.Ганбаатар, ТӨБЗГ-ын дарга Б.Цэнгэл нарт.

3/5-Гадаад валютын улсын нөөцийг нэмэгдүүлэх чиглэлээр авах зарим арга хэмжээний тухай ЗГ-ийн 2022 оны аравдугаар сарын 5-ны өдрийн 362 дугаар тогтоолын хэрэгжилтийг хангуулж ажиллах.

Энэхүү тогтоолыг аравдугаар сарын 26-ны өдрөөс буюу өнөөдрөөс дагаж мөрдөх нь ээ.