СХД-ийн ИТХ,  Гэмт хэргээс урьдчилан сэргийлэх салбар зөвлөл, Цагдаагийн нэгдүгээр хэлтэс хамтран “Хөршийн холбоо” аяныг эхлүүлээд байна. Аяны гол зорилго нь гэмт хэрэг зөрчлийг бууруулах, урьдчилан сэргийлэх, өөрсдийн амьдарч буй нутаг дэвсгэрийнхээ эрүүл, аюулгүй амьдрах орчин нөхцлийг бүрдүүлэх, ахуйн хүрээнд үйлдэгдэж буй гэмт хэргийн гаралтыг бууруулах, үүнд иргэн бүрийн оролцоог нэмэгдүүлэх юм.

СХД-ИЙН ИТХ-ЫН ДАРГА Б.ХУЯГБААТАР: Хороо бүр дээр, тэр бүү хэл эгнээ гудамж бүрээр хөршийн холбоог гаргаж ажиллана

Өнгөрсөн долоо хоногт СХД-ийн удирдлагууд бид бүхэн дүүргийн иргэдтэйгээ уулзалт, хэлэлцүүлэг зохион байгуулсан. Анхан шатан дээр ямар асуудлууд тулгамдаж буйг тодруулж, асуудлыг холбогдох шат шатны газруудруу уламжлах, газар дээр нь шийдвэрлээд явах боломжтойг нь шийдэх зэрэг нэлээн үр дүнтэй уулзалтууд болсон. Ерөнхийдөө 43 хороо 15 мянга орчим иргэнтэй уулзлаа. Улмаар уулзалтад оролцсон иргэдийн зүгээс нийгмийн сайн сайхан, нийтийн хэв журмыг сахиулахтай холбоотой олон талт ажил, арга хэмжээний талаар санал санаачилга хэлж, ярьж байна. Өнөөдрөөс иргэдээс ирсэн хүсэлт, өргөдөл гомдлыг нэгтгэх ажил эрчимжиж байгаа.

Иргэддээ хүргэж байгаа төрийн үйлчилгээн дээрээ анхаарч, шинэ түвшинд аваачих хэрэгтэй болсон гэж би хувьдаа дүгнэсэн. Учир нь иргэд төрийн үйлчилгээн дээр гомдол санал их байна. Мөн хууль эрхзүйн мэдлэг мэдээлэл дутмаг байна гэхчлэн уулзалтын үр дүн, судалгаагаа цааш цаашдаа ажил хэрэг болгоод явах юм.

“Хөршийн холбоо” аян бол орон байр, хороо нэгж дээр үйлдэгдэж байгаа гэмт хэргийг багасгах зорилготой урьдчилан сэргийлэх ажил юм. Иргэдийн зүгээс “хуучин байсан хөршийн холбоо, айл бүхэн амь нэг байдаг гэхчлэн зөв үзэл суртлын ажил хаягдаж байна” гэдгийг хэлж байна. Тиймээс энэ аянаар нийгмийн сайн сайхны төлөө аль болох олон иргэнийг татан оролцуулах шаардлагатай байгаа.

Хороо бүр дээр, тэр бүү хэл эгнээ гудамж бүрээр хөршийн холбоог гаргаж ажиллана. Тухайлбал, нэг хороонд 25-30 гудамж байдаг бол хэдэн гудамжны дунд нэг хөршийн холбоог бий болгох вэ, иргэний оролцоог хэрхэн яаж хангаж ажиллах уу  гэдгийг сайн дурын зөвлөлүүд маань гаргаад явах юм.

СХД ДЭХ ЦАГДААГИЙН ГАЗРЫН ДАРГА, ХУРАНДАА Х.УУГАНБАЯР: Өрх гэр амгалан бол хороо амгалан. Хороо амгалан бол дүүрэг амгалан

Хороо бүрийн ИТХ-ын дарга нар, хэсгийн байцаагч, алба хаагчдын хамтын ажиллагааны үр дүнд энэ ажил явагдана.

Гарч буй гэмт хэргийн 50-60 хувь иргэдийн өмчлөх эрхийн эсрэг, 30-40 хувь хүний амь нас эрүүл мэндтэй холбоотой танхайрах гэмт хэрэг голлон үйлдэгддэг. Сүүлийн үед гэр бүлийн хүчирхийллийн хэргүүд нэмэгдэж байна. Тэгвэл ахуйн болон амьдарч буй орчинд үйлдэгддэг эдгээр гэмт хэрэг, зөрчлөөс сэргийлэхэд Хөршийн холбоо маш чухал үүрэгтэй. Урд өмнө байсан хөршийн холбоог сэргээж, шинэчилж, улам төгөлдөржүүлж СХД-ийн нутаг дэвсгэрт хэрэгжүүлж байгаа энэхүү ажилд иргэн бүрийг идэвхтэй оролцохыг уриалж байна.