Засгийн газрын өнөөдрийн /2022.10.19/ ээлжит хуралдаанаас гаргасан шийдвэрийг танилцууллаа.

Хууль зүй, дотоод хэргийн сайд Х.Нямбаатар: Ерөнхий прокурор, тагнуулын байгууллагын дарга, Үндэсний аюулгүй байдлын Нарийн бичгийн даргаар ажиллаж байсан хүмүүс Эрүүгийн хэрэгт холбогдсон.

Хөрөнгө оруулалтын тухай хуулийн шинэчилсэн найруулгыг боловсруулах ажил дуусч байна. Удахгүй холбогдох яамдаас санал, дүгнэлтээ авч Засгийн газрын хуралдаанаар хэлэлцүүлж, УИХ-д өргөн мэдүүлэхээр төлөвлөж байна. Гадаадын хөрөнгө оруулагчдын төлөөлөлтэй уулзсан. Сонирхуулахад, Монголд гадаадын хөрөнгө оруулалттай 20 орчим мянган аж ахуйн нэгж үйл ажиллагаагаа явуулж байна. Эдгээрийн төлөөлөлтэй уулзаж, маш олон санал хүлээж авсан. Монголд үйл ажиллагаа явуулахад юун түрүүнд хуулийн этгээд байгууллагаас эхлээд хүндрэл учирдаг гэсэн. Ердийн аж ахуй нэгжтэй адил журмаар хуулийн этгээд болж бүртгүүлэх хүсэлтэй байгаагаа хэлсэн. Өөрөөр хэлбэл, E-Mongolia системээр бүртгүүлэх боломжийг нээж өгөхийг хүссэн. Гадаадын хөрөнгө оруулалттай аж ахуйн нэгжийг бүртгэхэд хөрөнгө оруулалтын хувь хэмжээг бэлнээр төвлөрүүлэх дүн өндөр байна, зарим хууль эрх зүйн орчин өөр хоорондоо зөрчилтэй байна гэх мэт асуудлууд байна. Тухайлбал, ашигт малтмалын лицензтэй холбоотойгоор орон нутгийн удирдлагаас гаргаж буй шийдвэр хүндрэл учруулж байна гэдэг санал хэлж байна. Засгийн газраас гадаадын хөрөнгө оруулалттай аж ахуй нэгжүүдэд дуудлага худалдаагаар ашигт малтмалын хайгуулын лицензийг худалддаг ч газар дээр нь очихоор дахин орон нутгаас газар эзэмших гэрчилгээ авах болдог. Үүнээс бол 2-3 жил хугацаа алддаг. Бид энэ бүх бэрхшээлийг арилгахаар Хөрөнгө оруулалтын тухай хуулийн шинэчилсэн найруулгыг боловсруулж, даган гарах хуулиудыг өргөн барина.

Гадаадын хөрөнгө оруулагчдыг тонон дээрэмдсэн, хамтарч ажиллаж байсан нөхдүүд нь иргэний болон эрүүгийн хэрэгт холбогдуулан хууль хүчний байгууллагатай хамтарсан байна. Энэ талаар судалгааны түүврийг гаргаж байна. Улсын ерөнхий прокурор болон мөрдөн шалгах чиг үүрэгтэй байгууллагын удирдлагуудтай аравдугаар сарын 28-нд ажлын хэсгийн санал дүгнэлтийг гардуулж өгнө.

Бид 2012-2022 оны хооронд гадаадын хөрөнгө оруулалттай аж ахуйн нэгжүүд хэрхэн хохирсон, энэ хэрэгт хэн хэн холбогдсон, хэрхэн хэргийг хаасан талаар олон нийтэд ил болгоно.

Ерөнхий прокурор, тагнуулын байгууллагын дарга, Үндэсний аюулгүй байдлын Нарийн бичгийн даргаар ажиллаж байсан хүмүүст хүртэл холбогдох хэргүүдийн жагсаалтыг аравдугаар сарын 28-нд дэлгэрэнгүй мэдээлнэ.