Хүн доромжилсны төлөө төрөөс хошин шогийнхонд элдэв шагнал, гавьяатын тэмдэг зүүж өгдгөө одоо болимоор юм. Компаниуд зар сурталчилгаа, улс төрийн намууд сонгуульд хүн доромжлогч нараар нүүр царай хийж оодруулдгаа болих хэрэгтэй" хэмээн ХЗДХЯ-ны төрийн нарийн бичгийн дарга П.Сайнзориг өөрийн цахим хуудсандаа бичсэн нь цахим орчинд сенсаац тариад байна. Үүнтэй холбоотойгоор хошин урлагийнхан хүртэл жагсаж, түүнийг уучлалт гуйхыг шаардлаа.

П.Сайнзориг: Агуулга дээрээ анхаараасай гэдэг санаагаар урлагийнхантай холбоотой зүйл бичсэн

Хүний ярианы хэллэг, хүйсийн чиг баримжаа, ядуу ч байдаг юм уу тодорхой хэмжээний харагдах байдлаар нь доромжлох үзэгдэл их байна.

Ийм байдлыг хэвийн юм шиг ойлгодог болсон. Урлаг энэ байдлыг хэвийн юм шиг харагдуулж, ийм ойлголтыг хүүхэд, залуучуудад өгч болохгүй гэдэг зүйлийг бичсэн. Урлаг гэдэг зүйл ёс зүйтэй байх ёстой. Хүнд сэдвүүдийг хөндөж байгаа бол үзэгчдэдээ хэлж, тодорхой үзэгчтэй тайзан дээр тавих нь зөв.

Олон нийтийн сүлжээ, хэвлэл мэдээллийн хэрэгсэл, youtube суваг дээр тавьж байгаа бүх зүйл нь архидалт болон бусад юмсыг хэвийн мэт хошин шогийн байдлаар үзүүлж байна. Энэ нь зөв биш гэдгийг урлагийнхан ойлгож хүлээж аваасай. Агуулга дээрээ анхаараасай гэдэг санаагаар урлагийнхантай холбоотой зүйл бичсэн. Нэр зааж, аливаа этгээдийг доромжилсон зүйл байхгүй. 
МУГЖ Н.Ариунболд, Н.Онон нар П.Сайнзоригтой уулзахаар яамандтүүнтэй уулзахаар иржээ. 

МУГЖ Н.Онон: Төрийн нарийн бичгийн дарга нь Үндсэн хууль зөрчиж байна

Монгол Улс ардчилсан орон. Хүн үзэл бодлоо илэрхийлэх эрхтэй. Гэхдээ монгол төрийг төлөөлж буй, төрийн өндөр албан тушаалтан хүн өөрийнхөө хаягаар хошин урлагийнхныг доромжилсон. Шүүмжлэл бол байж болно. Шүүмжлэл, доромжлол нь асар их ялгаатай. 

Би бол төрийн нарийн бичгийн дарга нь Үндсэн хууль зөрчиж байна гэж үзэж байна. Хууль сахиулах яамны Төрийн нарийн бичгийн дарга нь Үндсэн хууль зөрчиж, ажил мэргэжлээр нь хүнийг доромжилсон тул албан ёсоор уучлалт гуйхыг шаардаж байна. Энэ мэргэжлээрээ бид гэр бүлээ тэжээдэг. Бид үр хүүхэдтэй, гэр бүлтэй хүмүүс. Алиа салбадайн хүүхэд гэж хүүхдээ хэлүүлмээргүй байна.

Манай хошин урлагийнханд алдаатай, оноотой зүйл байдаг гэвэл энэ нь шүүмжлэл. Харин алиа салбадай гэж доромжлохыг би хүлээн зөвшөөрч чадахгүй. Төрийн хүн ямар орчинд юу хэлэхээ мэддэг байх ёстой. Миний дүү байсан бол үсэртэл нь алгадмаар байгаа. Байж боломгүй үг хэлсэн гэж бодож байна" гэлээ. 

МУГЖ Н.Ариунболд: Ирж яваа залуучуудыг төрийн өндөр албан тушаалан хүн ирийг нь мохоож болохгүй

"Маш олон залуус жүжигчин болж гарч байна. Энэ залуус тухайн цаг үеийн хөгжлөөрөө инээдмийн жүжиг, кино, тоглолт, контент хийгээд чөлөөт уран бүтээлч болж байна. Тэд маань хоолондоо хүрэх гээд явж байхад ах нар нь дүү нараа өмөөрч, ир өгөхгүй бол ирж яваа залуучуудыг төрийн өндөр албан тушаалан хүн ирийг нь мохоож болохгүй.

Харин ч чөлөөт уран бүтээлчдээ төр нь дэмнэх ёстой байтал өөрийнхөө амны зоргоор уран бүтээлчдийг нийтээр нь хэлж болохгүй. Алдаа оноотой зарим уран бүтээлчийн зарим нэг уран бүтээлээр нь нийтийг хамруулдаг байдал хариуцлагатай албан тушаалтны амнаас гарсан гэхэд итгэхэд бэрх байв. Чанга хашхирч, чанга ярьдаг, чанга шүүмжилдэг хүмүүс ажлаа хийж байгаа хүмүүст харагддаг юм болов уу. Хууль зүйн яам зөндөө ажилтай байх. Гэтэл хаа байсан Соёлын яамны, соёл урлагийн бодлого, боловсон хүчний ажил руу орж байдаг ямар их завтай хүн бэ гэж харж байна.