Өчигдөр буюу 2022.10.17-ны өдөр Хэнтий аймгаас Дорнод аймагт цэрэгт татагдсан цэргүүдийг тээвэрлэж явсан автомашин осолдсон талаар бид мэдээлсэн. Тодруулбал, цэрэг тээвэрлэж явсан машин Сүхбаатарт аймгийн Түмэнцогт сумын ойролцоо осолдож зургаан цэрэг эмнэлэгт хүргэгдсэн аж. Тэгвэл уг ослын талаар  Хил Хамгаалах Ерөнхий газрын дарга Х. Лхагвасүрэн мэдээлэл хийлээ.

Тэрбээр “Цэрэг татлага болж байгаатай холбогдуулан 0306 дугаар анги Хэнтийгээс цэрэг татаад Дорнод аймагт байх цэргийн анги руугаа явах үед осол гарсан. Машины рулийн аппарат хагарсан. Хоёр цэрэг хүзүүний зөөлөн эдийн гэмтэл авсан. Бусад цэргийн алба хаагчид зүгээр байна гэсэн мэдээлэл өгсөн.

Тээврийн хэрэгсэл хүрэлцэхгүй байгаагаас шалтгаалан тээврийн компаниудтай харилцан тохиролцон аймаг хооронд тээвэр гүйцэтгэж байна. Хил заставуудад тээврийн хэрэгслийн асуудал хүнд байна. Саяын осолтой холбогдуулан дотоод хяналт шалгалтаа сайжруулж, холбогдох албан тушаалтнуудад хариуцлага тооцно. Тээвэрт явж буй автомашины бүхий л эд ангийг шалгаж гаргадаг. Осолдсон автомашин ердөө 40 км/цаг хурдтай явж байсан, замын бартаа саад гарсан байна лээ.

15 цэргийн алба хаагч, нэг ахлагч, нэг офицер нийт 17 хүн автомашинд явж байсан.

Одоогоор цэргүүдийн ар гэрийнхэн эмнэлэг дээр ирсэн. Эмч нар эцэг эхчүүдтэй уулзаж мэдээлэл өгсөн байгаа. Мөн осолд орсон цэргүүд өөрсдийн саналаар цэргийн алба хаахыг зөвшөөрвөл үргэлжлүүлж болно. Энэ жилдээ өнжих санал гаргасан цэргүүдийг өнжөөх арга хэмжээг газар дээр нь авч байгаа” гэв.

Дашрам хэлэхэд, хол замд тээвэрлэж буй цэргүүдийг 2 цаг тутамд зогсож амрааж, 4 цаг тутамд хооллох ёстой байдаг аж. Мөн 22.00 цагаас хойш хөдөлгөөн үйлдэхгүй байх журамтай.