“Өргөө" амаржих газрын захирал Ж.Энхцэцэгийг үүрэгт ажлаас нь чөлөөлөх шийдвэр гарч, багагүй шуугиан дэгдээгээд байна. Үүнтэй холбоотойгоор Төрийн нарийн бичгийн дарга Ц.Эрдэмбилэг тайлбар өглөө

Тэрбээр “Бид шалгалт хийсэн. Шалгалтаар цөөнгүй зөрчил илэрсэн. Ялангуяа Эрүүл мэндийн сайдын тушаалаар баталсан бүтэц, орон тоо, дүрмийг “Өргөө" амаржих газрын захирал Ж.Энхцэцэг өөрөө дур мэдэн өөрчилсөн байсан. Мөн сонгон шалгаруулалт холбоотой заалтуудыг ч өөрчилсөн байх жишээний. Яг өөрийн харьяаны дор ажиллах функцүүдээ өөр дэд захирлуудруугаа шилжүүлсэн, санхүүгийн үйл ажиллагаа зэрэг олон асуудлыг гаргасан байсан. Энэ бүхнийг манай Хяналт шинжилгээ, үнэлгээ, дотоод аудитын газраас илрүүлээд наймдугаар сарын 22-ны өдөр зөвлөмж албан бичгээр хүргүүлсэн. Нэг сарын хугацаанд зөрчлүүдээ залруулах зөвлөмж өгсөн гэсэн үг. Үүнээс сарын дараа холбогдох албаныхан зөвлөмжийн хэрэгжилттэй танилцахад зөрчлүүд хэвээрээ байсан. Түүнчлэн, өргөдөл гаргасан хүмүүсийн ихэнх гомдол харилцаа, ёсзүйтэй холбоотой. Тиймээс бид яамны харьяа Ёсзүйн хороондоо хүсэлт тавьж шалгуулсан. Эндээс өгсөн дүгнэлтээр Төрийн захиргааны болон үйлчилгээний албан хаагчдын ёсзүйн дүрмийн хэд хэдэн заалт, эмнэлгийн мэргэжилтний ёсзүйн дүрмийн мөн нэлээд хэдэн заалтаар зөрчил гаргасан нь тогтоогдсон.

Өнгөрсөн долоо хоногт ЭМ-ийн сайд Ж.Энхцэцэг даргыг дуудаж тайлбар авсан. Харамсалтай нь өөрөө эдгээр зөрчлөө хүлээн зөвшөөрөөгүй ” хэмээв.

Үргэлжлүүлэн тэрбээр "2021, 2022 онд "Өргөө" амаржих газарт нийт 138 ажилтан, албан хаагч ажлаас чөлөөлөгдсөн. Үүнээс 60 орчим хувь өөрсдөө ажлаас чөлөөлөгдөх хүсэлт гаргасан. Эдгээр хүмүүс ажлын дарамт шахалт байсны улмаас чөлөөлөгдөх хүсэлтээ өгсөн гэдэг зүйл хэлээд байгаа. ЭМЯ-наас тус амаржих газрын хэвийн үйл ажиллагааг хангахаар зөвлөх баг гаргасан" гэв.

Ташрамд хэлэхэд, "Өргөө" амаржих газрын захирлыг томилтол "Амгалан" амаржих газрын дарга Ц.Батболдыг түр томилжээ.