УИХ-ын чуулганы нэгдсэн хуралдаан эхэллээ. Хуралдаанаар Мөнгөн зээлийн үйл ажиллагааг зохицуулах тухай хуулийн төслийг хэлэлцэнэ. 

Тус хуулийн төсөлд нэгдсэн бүртгэлд бүртгүүлэлгүйгээр зээлийн үйл ажиллагааг ашгийн төлөө, байнга явуулах тохиолдолд хүү авах эрхээ алдаж, холбогдох зөрчлийн хэргийн хариуцлага хүлээлгэх нөхцөл бүрдэх юм. Ингэснээр Иргэний хуульд заасан зээлийн үйл ажиллагаа эрхлэх эрх бүхий этгээдэд тооцогдон хоног тутам алданги тооцохгүй байх, гэрээнд заасан бол нэмэгдүүлсэн хүү тооцох боломжтой байдлаар хуулийн төсөлд тусгасан байна. Мөн өдрийн зээл буюу хүүг урьдчилан авахыг хориглох асуудлыг тусгажээ.

Яг одоо хуулийн төсөлтэй холбоотойгоор гишүүд байр сууриа илэрхийлж байна.

УИХ-ын гишүүн Б.Пүрэвдорж “Энэ жил зуншлага маш муу байсан.Баян-Өлгий, Баянхонгор, Ховд, Увс гээд баруун аймгуудад мал тарга, тэвээрэг муу байна. Тиймээс өвөлжилт хүндэрнэ.

 Төр засгаас малчдын өвөлжилт дээр анхаармаар байна. Ерөнхий сайд Л.Оюун-Эрдэнэд өвс, тэжээлийг гааль болон НӨАТ-аас чөлөөлөх албан бичиг өгөөд байгаа. Хивэг төвийн бүсээрээ л борлогдоод дуусдаг. Тэгэхээр баруун аймгаар орж ирж байгаа өвс тэжээлийн татварыг тэглэх зайлшгүй шаардлага байна.

Квот нэрийн дор малчдаас бог тутмаас 20 мянган төгрөг, бод тутмаас 200 мянган төгрөг хулгайлж байна.

Дулааны аргаар боловсруулсан мах үйлдвэрүүд дээр түгжигдсэн. Үйлдвэрүүд мөнгө байхгүй болохоор ченжүүд мөнгөгүй. Иймээс Ховдод очиж мал авах хүн алга. Тэгэхээр экспортын бодлогыг анхаармаар байна. Үүний үр дүнд малчдын орлого сайжирна.

Өвөлжилтийн бэлтгэл ажлыг хангах, малчдын малыг арай илүү өндөр үнэтэй борлуулах нөхцөл шаардлагын үүднээс махны аж ахуй нэгжүүдийг дэмжих, тэжээлийн хямдрал, гааль НӨАТ-ыг хилээр орж ирэхэд чөлөөлөх зайлшгүй шаардлагатай байна. Амьдрал мэдэхгүй хүн маш олон байна. Дорнодоос сонгогдсон ХХААХҮ-ийн сайд Х.Болорчулуун малчдын асуудлыг мэдэхгүй байна” гэв.