Эрүүл мэндийн сайдын албан томилолт өнөөдөр Нэгдсэн эмнэлгийн Төвлөрсөн ариутгалын тасгийн нээлтийн  үйл ажиллагаанд оролцохоос эхэллээ. Тус үйл ажиллагаанд Эрүүл мэндийн сайд С.Энхболд, УИХ гишүүн Т.Аубакир, Баян-Өлгий ИТХ-ын дарга Н.Бейбитхан, Засаг даргын орлогч С.Хонаев болон эмнэлгийн удирдлагууд, эмч ажиллагсад оролцлоо.АХБ, ЭМЯ-наас хэрэгжүүлж буй “Эрүүл мэндийн салбарын хөгжил хөтөлбөр-5” төслөөс Баян-Өлгий  аймгийн нэгдсэн эмнэлэгт цусны аюулгүй байдлыг бэхжүүлэх, халдварын сэргийлэлт хяналтыг сайжруулах  чиглэлээр 1,6 тэрбум төгрөгийн хөрөнгө оруулалт хийгдэж, 296 сая төгрөгийн өртөг бүхий  хэвлийн хөндийн мэс заслын дурангийн иж бүрдэл, Алтай болон Дэлүүн суманд фургон автомашин гардуулав.

    Энэхүү барилгын засвар, тоног төхөөрөмж, технологийн шинэчлэлт хийснээр Баян-Өлгий  аймгийн нэгдсэн эмнэлгийн ариутгал халдваргүйтгэлийн тасаг  орчин үеийн халдварын сэргийлэлт, хяналтын зарчимд тулгуурласан зөв зохион байгуулалт, агааржуулалтын систем бүхий дэд бүтэцтэй болж, мэс заслын болон дурангийн давтан хэрэглэгддэг багаж, хэрэгслийн угаалга, халдваргүйжүүлэлт, ариутгал  олон улсын түвшинд нийцлээ.

   Энэхүү хөрөнгө оруулалтаас өнөөдөр аймгийн нэгдсэн эмнэлгийн төвлөрсөн ариутгалын тасгийн 397.0 сая төгрөгийн барилгын  их засвар болон 785,4 сая төгрөгийн өртөг бүхий ханган нийлүүлсэн 13 ширхэг тоног төхөөрөмж болон  28,7 сая төгрөгийн өртөг бүхий видео ларингоскоп иж бүрдэл, яаралтай тусламжийн хэрэгсэл, амбу зэрэг 20 ш  тоног төхөөрөмж, хэрэгсэл зэргийг хүлээлгэн өгсөн байна. 

   Энэ үеэр Эрүүл мэндийн сайд С.Энхболд “Монгол Улсын эрүүл мэндийн байгууллагуудын халдварын сэргийлэлт, хяналтын асуудлуудыг олон улсын стандартын түвшинд хүргэх,  орчин нөхцөлийг бүрдүүлэхэд мэдлэг оюунаа дайчлан, чармайн оролцсон бүх оролцогчид, төслийг санхүүжүүлэгч АХБ, төслийг хэрэгжүүлэгч багийн хамт олонд хувиасаа болон Эрүүл мэндийн салбарын нэрийн өмнөөс чин сэтгэлийн талархал” илэрхийллээ.

Эрүүл мэндийн сайд С.Энхболд аймгийн Нэгдсэн эмнэлэг, Төрөх тасаг, Хүүхдийн эмнэлэг, удахгүй ашиглалтад орох Нэгдсэн эмнэлгийн барилгын явц болон Зоонозын өвчин судлалын төвд очиж газар дээр нь барилга байгууламж, үйл ажиллагаатайн  танилцаж ажиллаа.

Нэмж дурдахад: 2022 онд Баян-Өлгий аймагт улсын төсвийн хөрөнгөөр нийт 2,5 тэрбум төгрөгийн хөрөнгө оруулалт хийгдсэн байна.

УИХ-ын гишүүн Т.Аубакир болон Эрүүл мэндийн сайд С.Энхболд Баян-Өлгий аймагт ажиллах үеэр дараах тулгамдсан асуудлуудыг газар дээр нь шийдвэрлэлээ.

Нэгдсэн эмнэлэгт бүрэн тоногтой түргэний машин

Суурин болон зөөврийн рентген аппарат

Дурангийн хагалгааны аппарат/ цээж хөндийн/

Төрөх тасгийн иж бүрэн тоног төхөөрөмж

Алтай болон Дэлүүн суманд фургон автомашин

Мэдээгүйжүүлэт эрчимт эмчилгээний тасагт хяналтын монитор

Зоонозын өвчин судлалын төвийн байрны засвар, зуухны асуудал зэргийг шийдвэрлэлээ