Өнөөдөр охидын эрхийг хамгаалах олон улсын өдөр. Энэ өдрийн хүрээнд УИХ-ын гишүүн Ц.Мөнхцэцэгийн байр суурийг хүргэж байна.

Тэрбээр “Манай улсад 11-18 насны 220 мянга 225 охин бий гэсэн 2020 оны статистик тоо байна. Монгол Улсын Үндсэн хуулиар нас, хүйс, нийгмийн гарал угсаа үл харгалзан хуулийн өмнө адил тэгш эрхтэй хэмээн тунхагласан ч охидын амь нас, эрх чөлөөнд халдсан нийгмийг цочирдуулсан ноцтой хэргүүд удаа дараа бүртгэгдэж байгаа нь туйлын харамсалтай.

Түүнээс гадна биологийн онцлогоос үүдэлтэй сарын тэмдгийн мөчлөгийн үед охидууд ариун цэврийн хэрэглэл авах боломжгүйгээс олон нийтийн дунд эвгүй байдалд орох, доромжлуулах зэргээс шалтгаалж хичээлдээ явахгүйд хүрч байгаа нь хүний эрхийн зөрчил гэж олон улсад үздэг.

 Шинэ Зеланд, Шотланд, ӨАБНУ зэрэг дэлхийн 21 улс, бүс нутагт охидод ариун цэврийн хэрэгслийг үнэ төлбөргүй олгохоор хуульчилсан байдаг.

Тэгэхээр Монгол Улс ч дэлхийн улс орнуудын жишгээр шат дараалалтай бодлого явуулах хэрэгтэй гэж миний бие анхлан дуугарч улс төрийн акц өрнүүлсэн билээ.

Эхлүүлсэн санаачилгыг маань хамгийн түрүүнд ХЭҮК соргогоор дэмжиж улсдаа ганц байдаг эмэгтэйчүүдийн хорих 407-р ангид ариун цэврийн хэрэглэлийн жилийн төсвийг суулгуулж өгсөн нь ялтны эрхийг дээдэлсэн, хүйсийн онцлог байдлыг харгалзан үзсэн алхам болж чадсан.

Үүнээс хойш “Гүнж” төвийн албан ёсны цахим хуудсанд нийтлэгдсэн мэдээллээс харахад, Монгол 3 дугаар сургууль, Монгол-Оросын хамтарсан 3 дугаар сургууль зэрэг нийслэлийн ерөнхий боловсролын таван сургууль, орон нутагт Завханы Улиастай хотод хэд хэдэн дунд сургууль, коллежид, Сэлэнгийн Зүүнбүрэн сумын сургуульд, Говьсүмбэр аймгийн Политехникийн коллежиудад энэхүү аян маань давалгаалж “Pad package”, “A young doctor” , “Яаралтай тусламжийн хайрцаг” , “Хэрэгтэй үедээ ашиглаарай”, “НУНА” зэрэг нэртэйгээр хэрэгжиж байна” хэмээжээ