Хууль бус томилгоо шаардаж, мессеж нь задарч бөөн хэл ам дагуулаад байсан УИХ-ын гишүүн Т.Аюурсайханы булхиа наадамтай зэрэгцэж дарагдаад өнгөрсөн. Ажлын карьер, мэргэжлээрээ ид ажиллаад явж байх насан дээрээ Ерөнхийлөгч асан Н.Багабандийн туслах, зөвлөхөөс холдоогүй түүнд улстөр “лифтэнд суух”-тай адил байсан биз. Тэрбээр одоогоос арав гаруйн жилийн өмнөөс улстөрийн замналаа эхлүүлж дүүргийн төлөөлөгчөөр сонгогдож байсан гэх.

Ингэж явсаар 2016 оны УИХ-ын сонгуулиар ялалт байгуулснаар өдгөө хоёр дахь удаагаа Чингэлтэйчүүдийг Их хуралд төлөөлж байна.  

Эргэн сануулахад, 2018 онд М.Энхболдыг ёсзүйн шаардлага хүлээж, УИХ-ын даргын суудлаас огцруулсан акцыг зохион байгуулсан таван гишүүний нэг нь Т.Аюурсайхан байв. Тэд М.Энхболдыг огцруулахын тулд гишүүдээс гарыг үсэг цуглуулж, чуулганы үйл ажиллагаа, төрийн ажлыг бүтэн сар гацааж байсан.

Эцэст нь, М.Энхболдыг суудлаас нь буулгаж, санасандаа хүрч чадсан. Энэ гавьяаныхаа дараа тэд бүгд албан тушаалд очсон. УИХ-ын гишүүн Т.Аюурсайханы хувьд ч мөн ялгаагүй УИХ-ын Аюулгүй байдал, гадаад бодлогын байнгын хорооны дарга, өдгөө  УИХ-ын дэд даргаар ажиллаж байна. Товчхондоо, өөрт ахадсан шагналаа тэр хүртсэн. Гэтэл одоо НХХ-ийн сайдад горилж суугаа талаар эх сурвалжууд онцолж байна.

Ерөнхийдөө “ул сайд”-ын орны хүн хэн болох вэ гэдэг марафоныг тэр хошуучилж байгаа сурагтай. Хэдэн эмэгтэй гишүүдийн нэрс яригдаж байсан ч эхнээсээ хэл амнаас залхсан уу буулт өгч, сайд болохгүй гэдгээ зарласан.  Харин Т.Аюурсайханыг ийн марафоны эхэнд гүйж байна гэж хэн санахав.