Чуулганы нэгдсэн хуралдаан түр завсарлаад байна. Өнөөдрийн хуралдаанаар хэд хэдэн чухал асуудлыг хэлэлцэж байна.

Хуралдааны эхэнд УИХ-ын гишүүн Ц.Даваасүрэн УИХ-ын дарга Г.Занданшатарыг шүүмжилж, харин Г.Занданшатар уураа Д.Ганбат гишүүнд гаргаснаар үргэлжлэв.

-Намын жагсаалтын ард хэн ч сонгогдож болно гэдгээс эмээж байна-

Ц.Даваасүрэн “Өнгөрсөн зургаадугаар сард Үндсэн хуулийн цэц Үндсэн хуулийн заалт тайлбарласан хууль бус үйлдэл гаргасан. Үүнтэй холбогдуулаад би УИХ-д хоёр асуудал тавьсан. УИХ-аас томилогдсон Одбаяр, Баясгалан гэх мэт хүмүүсийг эгүүлэн татаач ээ гэдэг.  Мөн энэхүү хууль бус үйлдэлтэй холбоотойгоор Цэцэд гомдол гаргасан. Эдгээр асуудлыг байнгын хороодоор хэлэлцэх ёстой байтал өнөөдрийг болтол таг чиг байна. Энэ долоо хоногийн хуваарьт лав алга. Ер нь УИХ-ын зүгээс үүнийг шийдэхээс өөр аргагүй. Цэцийн гаргасан  шийдвэр бол дахин сонгогдох боломжгүй гэж эмээсэн, жагсаалтын ард нуугдаж гишүүн болох гэсэн улстөрчдийн захиалга байсан. Үүнийг л ҮХЦ биелүүлсэн” гэв.

Үргэлжлүүлэн тэрбээр “УИХ-ын дарга Г.Занданшатарыг цэцийн асуудалд хариу өгөхгүй дараад байхаар бас нэг захиалагч нь юм болов уу гэж хардахад хүрч байна. Зургаадугаар сард та тойрогтоо очиж нэг сайн загнуулаад ирсэн. Тэрнээс 10 хоногийн дараа дээрх цэцийн шийдвэр гарсан. Баянхонгорчууд таныг 3-4 удаа сонгосон байх. Үүний хариуд нь ард түмний сонгох эрхийг булааж авч байгаа хууль бус үйлдлийг дараад суугаад байж болохгүй.

Ард иргэдэд улс төрчдийг эмээлгэх ганц ташуур бол гишүүнээр сонгох, сонгохгүй явдал. Хүнээ сонгож байгаагийн хүчинд улс орныхоо эрх ашгийг үгүй хийсэн улсуудыг дахин сонгохгүй үлдээж чадаж байна. Хэрэв нам сонгодог болвол тэд энд торойгоод л сууж байна. Энэ ганц ташуурыг нь хураагаад авчих юм бол иргэд эрх мэдэл, хөрөнгөтэй  хүмүүсийн эрхшээлд нэг мөсөн орно.

Намын жагсаалтын ард хэн ч сонгогдож болно гэдгээс эмээж байна.  УИХ-ын дарга та дарга болмогцоо үг дааж чадахгүй болжээ. Мөнхийн албан тушаалд очсон юм шиг ташуурсан байна. Үг дааж сур” гэв.

Г.Занданшатар түүний эл шүүмжлэлд “горимын санал биш байна. Хуулиа мөрдөж, өргөсөн тангарагтаа үнэнч байхыг сануулъя” гэдгээс өөр хариулт хэлж чадсангүй.