Эрдэнэт үйлдвэр ажилтнуудаа орон сууцжуулах хөтөлбөрийн хүрээнд “Уурхайчин-1, 2, 3” төслийг хэрэгжүүлэхээр төлөвлөсөн. Залуу ажилтнуудыг орон сууцаар хангах “Уурхайчин-1” төсөл тун амжилттай хэрэгжиж, захиалагчид шинэхэн, дулаан байрандаа тав тухтай амьдарч байна. Мөн амины орон сууцны “Уурхайчин-3” хорооллын барилгын явц төлөвлөгөөний дагуу явагдаж байгаа бол “Уурхайчин-2” төслийн барилгын явц газар шорооны ажлаас хэтрээгүй хоёр жилийн нүүр үзэж байна.

Байр захиалсан ажилчдын гомдол тэмцэлдээ хүрч, цахим орчинд анхаарал татаад буй.

Тиймээс энэ асуудлын талаар захиалагч тал болох “Эрдэнэт үйлдвэр” ТӨҮГ-ын Нийгмийн харилцааны хэлтсийн орлогч дарга Д.Эрдэнэбатаас тодруулсан юм.

- Уурхайчин-2 хорооллын талаар танай хэлтсийн зүгээс тухайн үед мэдээ, мэдээллээр хангаж байсан уу? Эсвэл мэдээлэл дутмаг байдлаас өнөөдрийн нөхцөл байдалд захиалагчид оров уу?

- Нийгмийн харилцааны хэлтсээс 2021 оны 1-р сарын 08, 21, 2-р сарын 08, 7-р сарын 29, 8-р сарын 18-ны өдөр “Уурхайчин-2” хорооллын талаар мэдээлэл өгч, ажилтнууддаа анхааруулж байсан. Харамсалтай нь манай ажилчид үүнийг хүлээж аваагүй, захиалгаа өгсөөр байснаар өнөөдрийн нөхцөл байдалд хүрсэн.

“Өргөө хаан констракшн” компани үйлдвэртэй гэрээ хийснийхээ дараагаас цахим сүлжээнд өөрийн барих хорооллын талаар сурталчилгаа хийж эхэлсэн. Үүнтэй холбоотой бид 70 хувийн гүйцэтгэлтэй болсон үед захиалгаа өгөөрэй гэсэн зөвлөмжийг удаа дараа өгч байсан.

-“Өргөө хаан констракшн” компани гэрээнд захиалгын талаар тусгагдаагүй гэдэг. Энэ үнэн үү?

-Эднийх гэрээний хоёр заалт зөрчиж байгаа. Нэгдүгээрт, компани 100 хувь өөрийн хөрөнгөөр барилгаа барина гэсэн заалт зөрчсөн. Хоёрдугаар, манай бүтцийн нэгжээр дамжуулж захиалга авна гэсэн заалт зөрчсөн.

-“Уурхайчин-2” хороолол баригдаж эхлээгүй 2 жилийн нүүр үзэж байгаагаас байр захиалсан ажилчдын эрх ашиг хөндөгдөж байна. Энд таны зүгээс ямар тайлбар өгөх вэ?

-“Эрдэнэт үйлдвэр” ТӨҮГ 1300 айлын орон сууцны “Уурхайчин” хорооллын төсөл хэрэгжүүлж байгаа. “Уурхайчин-1” хорооллын төсөл амжилттай хэрэгжиж дууссан. Бид 300 айлаар төлөвлөсөн ч нөөц бололцоогоо ашиглан 400 орчим айл шинэ байрандаа орсон байгаа. “Уурхайчин-2” хорооллын хувьд “Өргөө хаан констракшн” компанитай 2020 оны 12-р сарын 30-ны өдөр гэрээ байгуулсан. “Өргөө хаан констракшн” хятадын компанитай түншлэлийн гэрээтэй байсан. 600 айлын зургаан блок орон сууц баригдах ёстой. Тухайн компанитай 12-р сарын 30-ны өдөр гэрээ байгуулсны дараа, он гарсан даруй 1-р сарын 08-наас эхлэн Эрдэнэт үйлдвэрийн Нийгмийн харилцааны хэлтсээс ажилчдадаа мэдээлэл өгч эхэлсэн. Манай хэлтсийн зорилго бол ажилтнуудынхаа эрх ашгийг хамгаалах. Тиймээс “Уурхайчин-2” хорооллын барилга нүдэнд харагдах, итгэл төрөх хэмжээнд буюу 70 хувийн гүйцэтгэлтэй болсон үед захиалгаа өгөөрэй гэдэг зөвлөмжийг ажилтнууддаа удаа дараа өгсөн.

-Барилгын ажил царцсан гол шалтгаан юу вэ?

-“Өргөө хаан констракшн” компани цар тахлын нөхцөл байдлаас үүдэлтэй барилгын материалын үнийн өсөлт, хил гаалийн хүндрэлээс үүдэлтэй 50 гаруй тэрбум төгрөгийн алдагдал гарч байгаа гэж үзээд тодорхой хэд хэдэн санал тавьсан. Захиалагчийн м2-ын үнийг нэмэх, нэг давхрын үйлчилгээний талбайн үнийг 500 мянгаар нэмэгдүүлэх, гарааш худалдаж авах үнийг 5 сая төгрөгөөр нэмэгдүүлэх гэх мэт. “Өргөө хаан констракшн” компани 10 орчим тэрбум төгрөгийн алдагдлыг өөрсдөө үүрье гэсэн. Харин үлдсэн 28 тэрбум төгрөгийг Эрдэнэт үйлдвэр гаргаж өгөхийг хүссэн. Төр засгаас хэмнэлтийн хууль хэрэгжүүлж байгаа энэ цаг үед ийм хэмжээний мөнгө гаргах боломжгүй харагдаж байгаа. Магадгүй нааштай шийд гарахыг үгүйсгэхгүй. Эрдэнэт үйлдвэрийн Ерөнхий инженерээр ахлуулсан Ажлын хэсэг гараад ажиллаж байна.

Р.МЯГМАРЖАВ: “ӨРГӨӨ ХААН КОНСТРАКШН” КОМПАНИ 100 ХУВЬ ӨӨРИЙН ХӨРӨНГӨӨР “УУРХАЙЧИН-2” ХОРООЛЛЫГ БАРИХ ЁСТОЙ

Мөн "Эрдэнэт үйлдвэр” ТӨҮГ-ын Барилга, байгууламжийн хяналт, төлөвлөлтийн хэлтсийн хяналтын инженер Р.Мягмаржаваас “Уурхайчин-2” төслийн барилгын ажлын өрнөл явцын талаар тодрууллаа.

-“Эрдэнэт үйлдвэр” ТӨҮГ ажилчдынхаа нийгмийн асуудлыг шийдвэрлэх зорилгоор анх 2019 оны 5-р сарын 29-нд Ажлын хэсэг байгуулж, “Уурхайчин-2” хорооллын ажлыг явуулах техникийн тодорхойлолт боловсруулсан. Үүний дараа тендерийн урилга тавьсан. Тендерт гурван компани орсноос хамгийн хямд үнийн саналтай, хятадын компанитай түншлэлийн гэрээтэй “Өргөө хаан констракшн” компани ялалт байгуулсан. Тухайн үед барилгын ажлыг 2020 оны 12-р сарын 30-нд бүрэн дуусгаж хүлээлгэж өгөхөөр гэрээ байгуулсан.

-Техникийн даалгаварт юу тусгасан бэ?

-Тухайн компани түлхүүр гардуулах нөхцөлтэй, 100 хувь өөрийн хөрөнгөөр барьж, манай ажилчдад худалдан борлуулах үүрэгтэй. Дээрээс нь тухайн компани скиз зураг, ерөнхий төлөвлөгөөний зураг, архитектор төлөвлөлтийн даалгавраа, барилгын зургаа шинжээчээр батлуулах, геологийн дүгнэлт, байгаль орчны үнэлгээ хийлгэх, сүлжээний болон гадна төлөвлөлтийг цогцоор нь төлөвлөх үүрэг хүлээсэн. Мөн эдгээр үүргээ хэдий хугацаанд хийх төлөвлөгөөгөө гаргаж өгөх байсан. Энэ бол гэрээний салшгүй хэсэг. Төлөвлөгөөгөөр скиз зургийг 2019 оны 10-р сарын 25-нд хийсэн байх ёстой. Барилгын бүтээцийн зургийг 2019 оны 11-р сараас 2020 оны 01-р сар гэхэд хийж дуусгах, техникийн нөхцөлийг 2019 оны 11-р сарын 20-оос 2020 оны 1-р сарын 20-ны хооронд авах төлөвлөгөө хийж ирүүлсэн. Газар шорооны ажлыг 2020 оны 3-р сарын 20-оос 4-р сарын хооронд хийж дуусгана гэсэн. Барилга угсралтын ажлыг 2020 оны 12-р сарын 30 гэхэд дуусгах төлөвлөгөөтэй. Үндсэндээ жилийн хугацаанд барьж дуусгах гэрээ хийсэн. Гэтэл өдий болтол дуусгах нь бүү хэл эхлээгүй байна.

-Барилгын ямар ажил хийгдсэн байгаа вэ?

-Газар шорооны тэгшилгээний ажил, зургаан барилгын дөрвийнх нь бетон суурь тавигдсан байдалтай байгаа.

Эх сурвалж:  erdenettoday.mn