БГД-ийн ИТХ-ын төлөөлөгч  Ө.Ууганжаргал гэгч авлига, албан тушаалын гэмт хэрэг үйлдсэн болох нь шүүхийн шийдвэрээр тогтоогджээ. Тиймээс өнөөдөр тус дүүргийн ИТХ хуралдаж, төлөөлөгчийн бүрэн эрхийг нь дуусгавар болгох сурагтай.

Ө.Ууганжаргалын хувьд УБТЗ-д эрчим хүчний талын ажил хариуцсан удирдах албан тушаалтан байсан гэх.  

Шүүхээс түүнийг өнгөрсөн тавдугаар сард Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар нийтийн албанд томилогдох эрхийг гурван жилийн хугацаагаар хасаж, 10 сая төгрөгөөр торгох ялаар шийтгэжээ.

Улмаар НШШГГ-аас 2022 оны долдугаар сард БГД-ийн ИТХ-ын дарга Б.Сэмжидмаад шүүхийн шийдвэрийн талаарх мэдэгдлийг хүргэж, нэн даруй үүрэгт ажлаас нь чөлөөлөхийг мэдэгдсэн байна. Гэвч Б.Сэмжидмаа өдийг хүртэл хариуцлага тооцож, ажлаас нь чөлөөлөхгүй явсаар өнөөдөртэй золгожээ. Магадгүй ингэж цаг хожих, асуудлыг нуун дарагдуулах, авч хэлэлцэхээс цааргалахад нөлөөлсөн хүчин зүйл байсныг үгүйсгэхгүй ч бодлогын түвшний удирдах албан тушаалтан шүүхийн шийдвэрийг уландаа гишгэж, нийтийн албанд ажиллах эрхгүй хүнийг өдийг хүртэл ажлуулж байсан нь хариуцлагагүй үйлдэл гэж харж байна.

Эх сурвалжийн мэдээллээр, Ө.Ууганжаргал нь  сонгуулиар гэнэт гарч ирж, лифтээр өгссөн хүн гэхээр өнөөгийн УУХҮ-ийн сайд Ж.Ганбаатарын татаасны хүн байх магадлалтай. Гэсэн ч МАН-ын удирдах түвшнийнхэн хийгээд Засгийн газраас хариуцлага, шударга ёс, зарчим ярьж байгаа өнөө цагт авлигын хэрэгт ял шийтгэгдсэн төлөөлөгчид хариуцлага тооцохгүй өдийг хүрнэ гэдэг МАН ч дотроо үл ойлголцол, фракц, амбицаа барьж дийлэхгүй байгааг илтгэх. 

Баянгол дүүргийн хувьд  41 төлөөлөгчөөс 21 нь МАН-ынхан. Харин одоо Ө.Ууганжаргал хасагдахаар энэ тоо нэгээр буурна. Үлдсэн төлөөлөгчдөөс АН-аас 18 хүн, ХҮН-аас хоёр төлөөлөгч сонгогдсон байдаг.