Гадаадын тагнуулын байгууллагатай хамтран ажиллаж байгаад баригдсан гэх  Ч.Мөнхбаярт холбогдох хэргийн давж заалдах шатны шүүх хурал энэ сарын 20-21-нд болсон. Ингэхдээ анхан шатны шүүхээс түүнд оноосон 10 жилийн ялыг хэвээр үлдээж, түүний өмгөөлөгч Г.Баасан, А.Батдорж нарын гаргасан давж заалдах гомдлуудыг хэрэгсэхгүй болголоо.

Ийнхүү хоёр ч шатны шүүхээс түүний гэм буруутайг  тогтоочихлоо.

Гэтэл Ч.Мөнхбаярын өмгөөлөгч Г.Баасан, А.Батдорж нар энэ хэргийн талаар байсхийгээд л мэдээлэл хийх нь хэр зохимжтой вэ. Ингэхдээ "Ч.Мөнхбаярыг хэлмэгдүүлж байна. Сэтгүүлч Ч.Мөнхбаяр хоригдоод долоон сар гаруй хугацаа өнгөрлөө. Гадаадын тагнуулаас их хэмжээний мөнгө авсан гэж ор үндэслэлгүй гүтгэсэн. Гэмт хэргийг бүрэн шалгаж тогтоогүй. Тодруулаагүй зүйл олон бий. Мөрдөн шалгах ажиллагааг дутуу хийсэн” хэмээн олон нийтэд мэдээлсээр байгаа юм.

Уг нь ТЕГ, хуулийн байгууллага хэргийг шалгаад, прокурорын байгууллага хянаад шүүхээс гэм буруутайг нь тогтоосон бол Монгол Улсын иргэн ч бай, гадны улсын иргэн ч бай хуулийн дагуу хариуцлагаа хүлээх ёстой. Мөн гэм буруутай хэн  ч өөрт ногдуулсан ял шийтгэлээ хүлээх нь зөв. Гэтэл Ч.Мөнбаярын өмгөөлөгч дээр хэлсэнчлэн байсхийгээд л мэдээлэл хийж байгаа нь олон нийтийг талцуулах цаашлаад олон улсад эх орончдоо бариад хорьчихдог гэсэн ташаа ойлголт төрүүлэх хор хөнөөлтэй байгаа юм.

 Иймээс эх орноосоо урвасан энэ ноцтой хэрэг дээр хууль хяналтынхан дахин анхаарал хандуулж, өмгөөлөгч нар нь ямар учраас дахин дахин гарч ирж, олон нийтийн сэтгэлзүйг төөрөгдөлд оруулаад байгааг нягтлах шаардлагатай болов уу.

Энэтхэгийн Элчин сайдын яамны Хоёрдугаар нарийн бичгийн дарга Шири Ражендра Жха Мананд ямар хариуцлага тооцов?

Нөгөө талаар иргэн Ч.Мөнхбаяраас мэдээлэл худалдаж авч байсан гэх Энэтхэгийн Элчин сайдын яамны Хоёрдугаар нарийн бичгийн дарга Шири Ражендра Жха Мананг тойрсон асуудал ч бас олны анхаарлын төвд байна.

Юутай ч тагнуулын байгууллагын өгсөн мэдээллээр, Ч.Мөнхбаяр нь Энэтхэгийн Элчин сайдын яамны ажилтанд мэдээлэл өгч байсан нь нотлогдсон гэж байгаа ч түүнд ямар хариуцлага тооцсон нь олон нийтэд хаалттай сэдэв хэвээр үлдлээ.

Иргэн Ч.мөнхбаярын тухайд “Өмнөд монголчуудын соёлын холбоо”, “Монгол хүн монгол хүндээ тусалъя” ТББ-ын тэргүүнээр ажиллададаг.

Манай сайт ч мөн энэ тухай хөндсөн.

Тодруулбал, Монгол Улсад үйл ажиллагаа явуулж байгаа энэ олон Төрийн бус байгууллага тэр дундаа гадны хөрөнгө оруулалттай төрийн бус байгууллагуудын үйл ажиллагаанд хэн хяналт тавьдаг вэ гэдэг асуудлыг бид түрүүчийн удаа сөхсөн.

Нөгөөтэйгүүр энэ бол жижиг асуудал биш. Тиймээс дахин бүү давтагдаасай гэдэг агуулгаар нэвтрүүлэг мэдээлэл бэлтгэсэн билээ.

Тэр утгаараа хуулийн байгууллага энэ асуудлыг ч орхигдуулалгүй,  анхааралдаа авч энэ олон төрийн бус байгууллагуудыг цэгцлэх шаардлагатай юм. Цаашлаад Монгол Улсын хуулийг дагаж мөрдөөгүй хэн  боловч хуулийн дагуу хариуцлага хүлээдэг гэдгийг бататгаж Энэтхэгийн Элчин сайдын яамны Хоёрдугаар нарийн бичгийн дарга Шири Ражендра Жха Мананд ямар хариуцлага хүлээлгэснээ олон нийтэд дэлгэх нь зөв биз.

Эс тэгвэл өмгөөлөгчид нь гарч ирээд л хэлмэгдлээ, гэм буруугүй гэж хашгичдаг гаж тогтолцоо бий болох нь.