ХХААХҮЯ-ны гэрээтэй улсын төсвийн 5 орчим тэрбум төгрөгийн төсөвт өртөгтэй “Малын гаралтай түүхий эд боловсруулах цэвэрлэх байгууламж”-ийн тендерийг Б.Бадрах захиралтай “Саруул цамхаг” ХХК аваад 2020 онд ашиглалтанд хүлээлгэж өгөх ёстой байжээ. Гэвч өнөөдрийг хүртэл ашиглалтад хүлээлгэж өгөөгүй атлаа дахин 2 орчим тэрбум төгрөгийн төсөвт өртөгтэй Ховд аймгийн ХХААГ-ын лабораторийн барилгын тендерийг авсан талаарх мэдээлэл цахим орчинд тавигджээ.

Уг нь  Монгол Улсын Ерөнхийлөгч У.Хүрэлсүхээр ахлуулсан ажлын хэсэг түүнийг сайд байхад нь 2019 оны тавдугаар сард тус байгууламжийн барилга угсралтын ажлын явцтай танилцаж байсан. Энэ үеэр тус компанийнхан 2020 оны тавдугаар сард бүрэн ашиглалтад оруулж, хүлээлгэн өгөх төлөвлөгөөтэй ажиллаж байгаагаа ажлын хэсгийнхэнд онцолж байв. Хоногт 1500 м3 бохир усанд механик, химийн болон биологийн цэвэршүүлэлт хийх хүчин чадалтай тус байгууламжийн ТЭЗҮ, зураг төсөл, барилга угсралтын ажил тухайн үед 30 хувийн гүйцэтгэлтэй явж байгаа гэж байсан ч өдийг хүртэл хүлээлгэж өгөөгүй байгаа аж. 

Цэвэрлэх байгууламжийн тоног төхөөрөмжийг “Сант” ХХК гэрээний дагуу 1,2 тэрбум төгрөгийн өртгөөр нийлүүлж, аймгийн ЗДТГ-ын Хөрөнгө оруулалт, хөгжлийн бодлогын хэлтэс, ХХААГ-т хүлээлгэн өгч байжээ.

Ховд аймаг жилд 22,4 мянган тн мах, 6000 тн сүү, 1,720,6 тн ноос, 617,6 тн ноолуур, 20,7 мянган ширхэг үхрийн шир, 180.0 мянган ширхэг ямааны арьс, 140.0 мянган ширхэг хонины нэхийг зах зээлд нийлүүлж байна. Тиймээс орон нутагтаа үйлдвэрлэл байгуулан хөгжүүлэх, ажлын байрыг нэмэгдүүлэх зорилгоор уг ажлыг эхлүүлжээ.

Мөн нэр бүхий мэдээллийн сайтад энэ талаар  "Сүүлийн тендерийн асуудал нь хууль хяналтын байгууллагаар шалгагдаж байгаа. Говь-Алтай аймгийн захиргааны хэргийн анхан шатны шүүх үнэлгээний хороо хууль бус дүгнэлт гаргасан гэдгийг тогтоочихсон. Сангийн яам хүртэл АТГ-т хүргүүлсэн зөвлөмждөө энэ компанийг шаардлага хангахгүй байгааг албан бичигт тодорхой дурьдсан. Энэ компанийн барилгын үйл ажиллагаанд төр, аймаг орон нутаг нь хяналт тавьж чадахгүй болтлоо ялзарчихсан. Яам нь хүртэл дүлийрчихсэн. Яам нь ч мэдээлэл байхгүй. Хэвлэл очихоор харуул хамгаалалтаараа халхавчилж, хамаг бүдүүн дарга нар нь арьсаа хамгаалж, хэвлэлийн өөдөөс энгийн нэг мэргэжилтнээ яриулна.

Энэ Б.Бадрах гэж нөхөр яг хэн юм бэ, ямар том артай учраас улсын төсвийн ажлыг гацаагаад байгаа юм гэдэг нь анхаарал татаад байна. Б.Бадрахаас ярилцлага авья гэхээр сэтгүүлчийн биед халддаг, шүүх нь түүнийг өмгөөлж хамгаалдаг. Ийм муухай нийгэмд амьдарч байгаадаа ой гутаж байна" гэжээ.