Архангай аймгийн Засаг дарга М.Батжаргалын удаа дараа хууль зөрчиж буй үйлдлийн талаар өнөөдөр мэдээлэл хийв. 

2021 оны наймдугаар сарын 30-нд Архангай аймгийн Засаг даргаар улсын харцага М.Батжаргал томилогдон ажиллаж эхэлсэн. Энэ хугацаанд түүний хийсэн хууль бус үйлдлийг талаар өнөөдөр Авлигатай тэмцэх газарт хандаж, баримттай мэдээлэл хүргэсэн гэдгийг Архангай аймгийн Эрдэнэбулган сумын Иргэдийн хурлын төлөөлөгч Х.Отгонбат хэллээ.  Тэрбээр "Ашигт малтмалын лицензийг хууль бусаар олгож, тодорхой аж ахуйн нэгж, иргэнд давуу байдал бий болгодог жишиг Архангай аймагт тогтож, нутагших хандлагатай болсон. Тодруулбал, 2016-2020 оны хооронд Архангай аймгийн Цахир сумын нутаг дэвсгэрт алтны уурхайн лицензийг хуурамч тогтоол үйлдэх замаар олгосон байдаг. Энэ хууль бус үйлдэл одоогийн Засаг дарга М.Батжаргал даргын үед ч дахин давтагдаж байна. Аймгийн удирдлагууд Цахир сумын газар нутагт нэр бүхий компанид хууль зөрчиж лиценз эрх олгосон. 

Хууль бусаар лицензийн эрх авсан тухайн нэр бүхий компани нь дөнгөж 2015 онд байгуулагдсан байдаг. Улмаар 2021 оны арванхоёрдугаар сарын 28-нд Ашигт Малтмал Газрын Тосны Газар болон аймгийн Иргэдийн хурлын шийдвэрийг гаргуулж, дараа өдөр нь мөн Архангай аймгийн ЗДТГ-ын шийдвэрийг гаргуулсан байгаа юм. Ердөө дөрөвхөн өдрийн дотор бүх л бүтэн ашигт малтмалын лицензийг гаргуулсан байгаа юм. Өөрөөр хэлбэл, Засаг даргынхаа албан тушаалын бүрэн эрх хэмжээг илт хэтрүүлж, өөрийн хамаарал бүхий этгээдэд давуу байдлыг үүсгэсэн гэж үзэж болохоор байна. Энэ нь хуулийг илт зөрчсөн үйлдэл юм" хэмээв.