Төрийн албаны зөвлөлөөс Авлигатай тэмцэх газарт Баянхонгор аймгийн Засаг дарга Д.Мөнхсайхантай холбоотой гомдлыг өгчээ.

Д.Мөнхсайхан нь  Төрийн албаны зөвлөлөөс өгсөн удаа дараагийн шаардлагыг биелүүлэхгүй тус аймгийн Боловсрол, шинжлэх ухааны газрын даргаар төрийн жинхэнэ албаны удирдах албан тушаалын сул орон тоонд сонгон шалгаруулалтгүйгээр, мөн хуульд заасан шаардлага хангаагүй иргэн Э-г 2021 онд томилсон байна.

Тус зөвлөлөөс хууль бус дээрх шийдвэрийг хүчингүй болгуулахаар удаа дараа хандахад Э-г үүрэгт ажлаас нь чөлөөлөхдөө “эрүүл мэндийн шалтгаанаар ажлаас чөлөөлж, албан тушаалын гурван сарын үндсэн цалинтай тэнцэх хэмжээний нөхөн төлбөр” олгох шийдвэр гаргасан нь бусдад давуу байдал бий болгож улмаар Авлигын эсрэг хуулийг зөрчсөн болох нь шалгалтаар тогтоогджээ.

Орон нутаг ялангуяа аймаг, сумдад төрийн албанд сул орон тоо гарсан тохиолдолд сонгон шалгаруулалтыг нээлттэй ил тод явуулах, иргэнийг хуульд заасан болзол журмын дагуу нийтийн албанд орох адил тэгш боломжоор хангахгүй байх зөрчлүүд гарсаар байна.

Засаг дарга Д.Мөнхсайханы хувьд архидалтын асуудлыг таслан зогсоохын төлөө ажиллаж, архидалттай холбоотой асуудал үүсгэсэн төрийн албан хаагчийг ажлаас шууд чөлөөлнө гэдэг хатуухан мэдэгдэл хүртэл хийгээд байсан. Гэвч бодит байдал дээрээ өөрөө ийн ашиг сонирхол, авлигын хууль зөрчиж, дур зоргоороо авирлаж байгаа нь хэр зохимжтой вэ. Байсхийгээд л ямар нэг асуудалд холбогддог Д.Мөнхсайхан мэтийн орон нутгийн удирдлагууддаа МАН хариуцлага тооцож, авлигаас ангид байж, албан тушаалтанд хариуцлага тооцож чаддаг байна гэх амлалтаа биелүүлээч.  Баянхонгор аймгийн МАН-д олон жил зүтгэсэн, УИХ-ын дарга Г.Занданшатарын "гарын хүн" гэгддэг нь хариуцлага тооцохгүй байх шалтгаан биш.