АН-ынхан сонгуульдаа бэлтгэж, Ч.Сайханбилэг, С.Баярцогт, Б.Болороо “усалж” эхлэв үү

УИХ-ын гишүүн, Гадаад харилцааны дэд сайд, Сангийн сайд асан Б.Болор гэнэт л нийгэмд сенсаац дэгдээгээд буй Орос гуравдугаар сургуулийн захирлаар томилогдоод авлаа. Одоо нэг тодрох цаг болсон гэж үзсэн аятай хаа хамааралгүй Б.Болорыг олны өмнө чирж гаргаж ирсэн нь учир шалтгаантай биз.

Хаа хамаагүй гээд хэлчихээр бас зохимжгүй юм. Нэг хэсэг улс төрөөс ангид байж Орос гуравдугаар сургуульд математикийн хичээл зааж, багшилж байсан гэж байгаа. Энэ талаараа тэрбээр нэгэн хэвлэлд “төрөлх сургуульдаа багшилж байна” гэж ирээд л бичүүлж байсан санагдана. Төгссөн болохоор төрөлх болчихож байгаа юм байлгүй.  Гэхдээ түүний үндсэн мэргэжил нь эдийн засагч.

АН Ч.Сайханбилэг, С.Баярцогт, Б.Болороо нүүрэндээ тавьж байгаа нь ирэх сонгуульдаа бэлтгэж эхэлснийг илтгэх.  Гэхдээ тэд тийм ч нүүр тахалчихаар улс биш л дээ.  

Гурван шатны шүүхээс гэм буруутайд тооцогдож, 4.8 жилийн хорих ялаар шийтгүүлсэн С.Баярцогтыг саяхан цагаатгалаа гэдэг мэдээлэл цацагдаад удаагүй байхад өчигдөр /2022.09.15/  Ч.Сайханбилэгийг АН-ын "Үндэсний Бодлогын Хороо"-ны дэд даргад батламжилсан гэх. Харин Б.Болорыг Орос гуравдугаар сургуулийн захирлаар түр томилов.

Лав Б.Болорын тухайд Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан “Эрх мэдэл албан тушаалын байдлаа урвуулан ашиглах” гэмт хэрэг үйлдсэн гэм буруутайд тооцогдож нийтийн албанд томилогдох эрхээ 4 жилийн хугацаагаар хасуулж, 3 жил 6 сарын хугацаагаар хорих ялд унаж байсан.

Бүр тодруулбал, Ерөнхий сайд асан Ч.Сайханбилэг, Монголбанкны Ерөнхийлөгч асан Н.Золжаргал, Сангийн сайд асан Б.Болор, Аж үйлдвэрийн сайд асан Д.Эрдэнэбат нарын долоон хүн нь "Эрдэнэт үйлдвэр”-ийн Оросын талын эзэмшиж байсан 49 хувийн хувьцаанаас Засгийн газар татгалзаж, “Монголын зэс” ХХК-ийнханд давуу байдал олгосон гэх хэрэгт яллагдагчаар татагдаж байв.

Харин Б.Болорын тухайд анхан шатны шүүхийн шийдвэрийг татгалзаж, давж заалдсанаар хорих ял нь торгох шийтгэл болж өөрчлөгдсөн байдаг. Гэхдээ нийтийн албанд томилогдох эрхийг нь хассан шийдвэрийг Давж заалдах шатны шүүхээс өөрчилсөн эсэх нь тодорхойгүй өнгөрч байв. 4 жилийн хугацаагаар нийтийн албанд томилогдох эрхээ хасуулж байсан тэрбээр өнөөдрийг болтол багшилж, зөвлөж явсан гэхээр энэ эрх нь сэргэсэн байхыг ч үгүйсгэхгүй юм.

Ямартаа ч АН-аас ирэх сонгуульд дээрх хүмүүсээ урдаа гаргаж, Монголчуудын ой тогтоолт дээр тоглолт хийхээр зорьж буй бололтой юм.