-АЛТАЙ ХОТХОНЫ 5551 ӨРХИЙН 10 ГАРУЙ МЯНГАН ОРШИН СУУГЧДЫН ХҮҮХДЭД УЛСЫН СУРГУУЛЬ БАЙХГҮЙ-

УИХ-ын гишүүн С.Одонтуяа өчигдөр /2022.09.14/ БГД-ийн 24-р хорооны Алтай хотхоны төвлөрөл, сургууль цэцэрлэгийн хүрэлцээ, түгжрэлийн талаарх асуудлуудтай танилцан ажиллажээ.

“Алтай хотхон”-ыг “Тайгам Алтай” ХХК  барьж гүйцэтгэн улсын комисст хүлээлгэн өгсөн байдаг. Өдгөө 5551 өрхтэй 10 гаруй мянган оршин суугчтай төвлөрөл ихтэй томоохон хотхонуудын нэг юм. Харамсалтай нь хүн амын нягтрал ихтэй хотхонд нэг ч улсын сургууль байдаггүйд иргэд бухимдалтай байдаг аж. 

Барилгын зураг төсөлд улсын сургуулийг төлөвлөн зургаа батлуулсан ч хийж гүйцэтгээгүй өдийг хүрчээ. Улмаар улсын сургуульгүйгээс болж оршин суугчид Нарны хорооллын 141-р сургууль, Төмөр замын 73-р сургуульд хүүхдээ сургадаг байна. Гэвч сүүлийн жилүүдэд тус сургуулиудын  багтаамж дүүрч, “Алтай хотхон”-ы хүүхдүүдийг сургах боломжгүй болсон талаараа мэдэгдээд байгаа аж. 

Мөн хотын түгжрэлээс шалтгаалан баруун буюу нарны гүүр талаас, зүүн буюу дунд гол талаас машины урсгал нэмэгдэж #ХОТХОН дамжин өнгөрөх гарц болон хувирч байгаа явдлыг УИХ-ын С.Одонтуяа онцлон дурджээ.

Мөн түүнийг нөхцөл байдалтай танилцах үеэр авто замын эвдрэл гэмтэл ихсэж, оршин суугчид нэн ялангуяа бага насны хүүхэд аваар осолд их өртөж байгаа талаар БГД-ийн 24-р хорооны Засаг дарга Б.Дуламрагчаа  танилцуулсан байна.  Тиймээс “Тайгам Алтай” ХХК-нд зөвшөөрөл олгосон албан тушаалтанд хариуцлага тооцож, дээрх асуудлаар яаралтай арга хэмжээ авч шийдвэрлэх шаардлагатай байгаа талаар оршин суугчид хийгээд С.Одонтуяа гишүүн байр сууриа илэрхийлжээ.