Нийтээр тэмдэглэх баярын болон тэмдэглэлт өдрүүдийн тухай хууль, “Алсын хараа-2050” Монгол Улсын урт хугацааны хөгжлийн бодлогын баримт бичиг, Монгол Улсын Ерөнхийлөгчийн 2012 оны 158 дугаар зарлиг, Соёлын сайдын 2022 оны 05 дугаар сарын 05-ны өдрийн А/125 дугаар тушаалын дагуу бүх нийтийн уншлагыг дэмжих, номын сангийн өв санг арвижуулах, үндэсний бичиг соёлыг сурталчлах, хүүхэд залууст ном эрдмийг түгээн дэлгэрүүлэх зорилгоор Монгол Улсын Их Хурлын даргын ивээл дор “ИЛҮҮ ИХ УНШЪЯ” уриатай намрын “Үндэсний бичиг соёл, номын өдрүүд-2022” арга хэмжээг улс орон даяар 9 дүгээр сарын 16-18-ны өдрүүдэд зохион байгуулах гэж байна.

“Үндэсний бичиг соёл, номын өдрүүд-2022” арга хэмжээний нээлтийн ёслол 09 дүгээр сарын 16-нд 13.00 цагт  Д.Сүхбаатарын талбайд болох бөгөөд 21 аймгийн төв талбайд нэгэн зэрэг эхэлдгээрээ онцлог юм.

Мөн уншигч олон “Хүүхдийн номын хүрээ, “Үндэсний бичиг соёл, номын хүрээ”, “Соёлын бүтээлч, үйлдвэрлэлийн хүрээ”-гээр зочилж, хэвлэх үйлдвэр, хэвлэлийн газар, зохиолчид, хувиараа ном цуглуулагчдын номын худалдаа, төрөлжсөн номын үзэсгэлэн, хүүхдэд зориулсан соёлын арга хэмжээ, соёлын байгууллага, соёлын бүтээлч үйлдвэрлэлийн танилцуулга, эрдэмтэн мэргэд, зохиолчдын уулзалт, урлагийн тоглолт зэрэг 15 гаруй хөтөлбөртэй танилцаж болох нь ээ.

Ийнхүү үндэсний бичиг соёл, номыг сурталчлах, ном хэвлэлийн салбарынхны хамтын ажиллагааг дэмжих, бүх нийтийн уншлагыг дэмжих соёлын олон талт арга хэмжээ 3 өдрийн турш зохион байгуулагдах юм.

Тиймээс 32 дахь удаагийн номын баярт монголын нийт ард иргэд, хүүхэд багачууд,  оюутан залуус, гэр бүл, багш, сурган хүмүүжүүлэгчид, байгууллага, хамт олныг өргөнөөр оролцохыг уриалж байна.

Түүх сөхөхөд, 1950 оноос “Хуучин номын худалдаа”, 1955 оноос “Хүүхдийн номын зах”, 1990 оноос ”Номын баяр”, “Номын үзэсгэлэн’, 1999 оноос “Номын яармаг”, 2000 оноос “Бичиг соёлын хишиг өдөр”, 2012 оноос “Номын баярын өдөр” нэртэйгээр уламжлал болгон зохион байгуулагдсаар иржээ. Харин өдгөө Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу “Үндэсний бичиг соёл, номын өдрүүд” хэмээн өргөжин хүрээгээ тэлж номыг бүтээдэг, дээдлэн хүндэлдэг, номд дуртай хэн бүхний хүсэн хүлээдэг БАЯР болж байна.