Өнөөдрийн Засгийн газрын хуралдаанаар  /2022.09.14/ нийт 25 асуудлыг хэлэлцжээ. Энэ талаар ЗГХЭГ-ын сайд Д.Амарбаясгалан танилцууллаа.

Цахим хөгжил, харилцаа холбооны яамыг нүүлгэн шилжүүлнэ

Монгол Улс тэр дундаа Улаанбаатар хотын төвлөрөл, хотын төвийн авто замын түгжрэл зэрэг томоохон бодлогын асуудалд Засгийн газрын бодлогын түвшинд анхаарч ажиллаж байгаа. Төвлөрлийг сааруулах, түгжрэлийг бууруулах ажлын хүрээнд салбарын сайд нь ажилдаа ороод байна. Өнөөдөр Засгийн газрын хуралдаанаас Цахим хөгжил, харилцаа холбооны яамыг салбарынхаа бүрэлдэхүүнтэйгээр нүүх шийдвэрийг гаргаж байгаа.

Нэгдүгээрт, Олон улсын нисэх онгоцны буудлаар ажиллаж байсан Буянт-Ухаа цогцолбор маань цаашдаа нисэх буудлын бүрэн зориулалтаар ажиллах боломжгүй болсон. Шинэ нисэх буудал ашиглалтад орсонтой холбогдуулж  Японы Мицүбиши группийн концесийн гэрээгээр хүлээж байгаа үүрэг бол, Монгол Улс Буянт-Ухаа цогцолборыг  нисэх буудлын зориулалтаар ашиглах боломжгүй болж байгаа.

Буянт-Ухааг нөөц нисэх буудлаар ашиглахын тулд жилд 10 тэрбумын урсгал зардал гаргах шаардлагатай

Харин нөөц нисэх буудлаар ашиглаж болно. Гэхдээ нөөцөөр ашиглаж, хадгалахын тулд жилд 10 тэрбумын урсгал зардлыг улсын төсвөөс гаргах шаардлагатай тулгарсан. Мөн 21 мянган мкв талбай бүхий Буянт-Ухаа цогцолборын  нөөц нисэх буудалд зориулагдсан талбай нь 10 орчим мянган мкв талбай байгаа. Үндсэндээ цаана нь 11 мянган мкв талбай ашиглалтгүй байхаар нөхцөл үүссэн.  Тиймээс төр үүнийг үр бүтээлтэй ашиглахыг зорьж байна. Тэр дундаа  технологийн салбарыг хөгжүүлэх, Стартап бизнесийг дэмжих бүрэн боломж байна гэж үзлээ. Үүний хажуугаар нийгмийн дэд бүтцүүд болох, тухайн орчинд ажиллаж амьдарч байгаа иргэдийн хэрэгцээ шаардлагыг хангахуйц сургууль, цэцэрлэгийн хэрэгцээг бий болгох чиглэлээр төр үргэлжлүүлэн анхаарч ажиллах болсон.

Монгол Улсын Засгийн газрын хуралдааны журманд өөрчлөлт оруулав

Монгол Улсын Засгийн газрын хуралдааны журманд өөрчлөлт оруулах асуудлыг Ерөнхий сайдын өгсөн чиг үүргийн дагуу оруулж, батлууллаа.

Төрийн бүтээмж, хурд, илүү үр бүтээлтэй байх, эрдэмтэн судлаачид, хөндлөнгийн мэргэжилтнүүдийн санаа бодлыг Засгийн газраар хэлэлцэж байгаа асуудалд тусгаж байх зэрэг чиглэлүүдийг өгсөний үндсэн дээр өнөөдөр Засгийн газрын хуралдааны журамд тодорхой өөрчлөлт орууллаа.

Хурдын нэг дахин нэмэгдүүлэх өөрчлөлтийг энэхүү журмынхаа өөрчлөлтөөр хийж авсан гэдгийг онцоллоо.

Хувийн хэвшил хийж болох ажлыг төр төсөвт оруулж батлуулж болохгүй

Хувийн хэвшил, төрийн бус байгууллагуудаар хийлгэх ажил үйлчилгээнд авах зарим арга хэмжээний тогтоолыг төслийг ЗГХЭГ-аас санаачилж батлуулсан байгаа. Нэг ёсондоо, төр хувийн хэвшилтэй өрсөлдөж, тодорхой хэмжээний бизнес эрхлэх ёсгүй. Тэгэхээр хувийн хэвшил аваад явах боломжгүй ашиггүй бизнесийг төр олон нийтийн өмнө хүлээсэн нийгмийн хариуцлагын хүрээнд авч явна. Харин хувийн хэвшил ялангуяа жижиг дунд бизнесийнхэн аваад явах боломжтой зарим зүйлсийг төр авахыг таслан зогсооно.

Төрийн зүгээс эрхлэх шаардлагагүй хэд хэдэн бизнес байна.

Тухайлбал, сургууль, цэцэрлэгийн хүнс  хангамжийн үйлчилгээг хувийн хэвшил, мэргэжлийн өндөр шаардлага хангахуйц газрууд хийж явах боломжтой.

Түүнчлэн, тохижилт үйлчилгээний зарим чиг үүргийг хувийн хэвшлээр хийлгэх бүрэн боломжтой гэж үзсэн. Мөн гэрэлтүүлэг, цэцэрлэгжүүлэлт зэрэг бизнесийг богино хугацаанд тодорхой болгож бүгдийг цэгцэлнэ. Нэг ёсондоо, төсвийг ерөнхийлөн захирагч нар хувийн хэвшил хийж болох ажлыг төсөвт оруулж батлуулж болохгүй гэж үзэж байгаа.