Нийгмийн даатгалын ерөнхий газрын дарга Д.Зоригт ажлын байрандаа мөрийтэй тоглож байгаад баригдсан учир, өнөөдөр ажлаас нь чөлөөлсөн гэх мэдээлэл цахим орчинд тархаж байна. Энэ талаар НХХ-ийн сайд Д.Сарангэрэл үгүйсгэсэн бол Д.Зоригт "Семинараас сайдад дуудагдаад ирж байна. Намайг ажлаас чөлөөлөөгүй. Мөрийтэй тоглосон зүйл байхгүй" гэх тайлбарыг хэвлэлийнхэнд өгсөн юм.

Тэгвэл дөнгөж сая Засгийн газрын хуралдааны шийдвэрийг ЗГХЭГ-ын сайд Д.Амарбаясгалан танилцуулахдаа, "НДЕГ-ын дарга Д.Зоригттой холбоотой гомдол, баримтжуулсан зурагтайгаа ЗГХЭГ-т өнөө өглөө ирсэн. Тиймээс Засгийн газар шуурхай арга хэмжээ авч ёсзүйн хариуцлага тооцож, ажлаас чөлөөлөх чиглэлийг салбарын сайд Д.Сарангэрэлд өгсөн байгаа. Мөн ХЗДХ-ийн сайд Х.Нямбаатарт эл асуудлыг шалгах үүрэг даалгавар өгсөн.  Ямар мөнгөөр, ямар хүмүүстээ, хэзээ, хаана тоглосныг хууль хяналтын байгууллага олж тогтооно. Салбарын сайд нь халаагүй гэх мэдээллийг яагаад өгснийг мэдэхгүй. Тодруулна" гэв.

Эх сурвалжийн мэдээллээр мөрийтэй тоглоомын талаарх гомдлыг  иргэдийн санал, хүсэлт хүлээн авах  11-11 тусгай дугаарт нэгэн иргэн өгсөн гэх.

Нийгмийн даатгалын ерөнхий газрын дарга Д.Зоригийн тухайд жилийн дотор хөрөнгө орлогоо гурав дахин нэмэгдүүлсэн гэлцдэг. Тухайлбал,  2017 онд 36 сая төгрөгийн жилийн орлоготой хэмээн мэдүүлж байсан бол 2018 энэ орлогоо гурав дахин нэмэгдүүлж, 115 сая төгрөг болгожээ. Түүний гэр бүлийн гишүүдийн орлого ч мөн нэмэгдсэн байдаг. 

Тэрбээр мөн "Эрдэнэс таван толгой" ХК, "Талх чихэр" ХК, " Бумба-Хүнс" ХХК, "Хайтек" медиа групп ХХК-иудаас хувь болон хувьцаа эзэмшдэг тухайгаа ХОМ-дээ мэдүүлж байсан.