Өвөрхангай аймгийн Хархорин сумын Нэгдсэн эмнэлэг улсын төсвийн 1.1 тэрбум төгрөгийн хөрөнгө оруулалтаар Эрүүл мэндийг дэмжих төвтэй болсон байна. Ингэснээр тус сумын 13 мянган иргэнээс гадна зэргэлдээ аймаг, сумынхан, хол ойроос ирсэн аялагчид, жуулчид гээд олон хүнд эрүүл мэндийн үйлчилгээг цогцоор үзүүлэх мөн сэргийлж болох халдварт ба халдварт бус өвчнөөс урьдчилан сэргийлэх, өвчний эрт илрүүлэг, Эрүүл мэндийн боловсролыг хүртээмжтэй олгох зэрэг үйлчилгээг үзүүлэх боломж нэмэгджээ.

ЭМД төвтэй болсноор дижитал рентген, суурин болон зөөврийн эхо аппарат, нүд, шүд, чих хамар хоолойн үзлэг, эмчилгээний иж бүрэн аппарат зэрэг 24 төрлийн тоног төхөөрөмжийг нийлүүлсэн бөгөөд мөн ходооны уян дурантай болгох гэж буй талаар УИХ-ын гишүүн С.Чинзориг онцолсон байна.

Харамсалтай нь ходоодны уян дуранг ажиллуулах эмчээ мэргэшүүлэх 3 сарын сургалтад хамруулах нь тус төвийнхний толгойны өвчин болоод буй гэнэ.

Тэгвэл энэ талаар УИХ-ын гишүүн С.Чинзориг “Эмч нарын сургалтын асуудлыг хариуцдаг Эрүүл мэндийн хөгжлийн төвд хандаж, жилдээ хоёр удаа тав, аравдугаар сард элсэлт авдаг, цахимаар бүртгэлээ хийдэг журмынх нь дагуу яваад өнгөрсөн жилийн квотод хамрагдаж чадаагүй. Өнгөрсөн жил хот, хөдөөгийн 28 эмч бүртгүүлэхэд 8-ыг л авсан. Энэ жил аравдугаар сарынхад 2 хүнийг л сургана гэж байгаа тул эмч нь сурах эрх авч чадахгүй хоцрох вий гэсэн болгоомжлол байна” гэжээ. 

Мөн тус төвд тархины цахилгаан бичлэг, тархины судасны бичлэгийн аппаратыг ажиллуулах эмчээ сургалтад хамруулах шаардлага ч байгаа гэв. 

С.Чинзориг гишүүний хувьд энэ тухай ярилцаж, зарим зүйлийг тодруулахаар Эрүүл мэндийн хөгжлийн төвийн дарга Б.Нарантуяа руу залгахад тодорхой тайлбар сонсох нь бүү хэл хэл санаагаа ч бүрэн дуусгах боломж өгөлгүй “журам нь ийм” гээд утсаа тасалжээ.  

Засгийн газраас хүн амд ялангуяа хөдөөгийн иргэдэд үзүүлэх эрүүл мэндийн тусламж үйлчилгээг сайжруулах, эмнэлгүүдийн өрсөлдөх чадавхийг нэмэгдүүлэх бодлого энэ мэт дунд шатныхны хойрго, хөшүүн, хайхрамжгүй, сэтгэлгүй хандлагаас болоод үр дүнд хүрэхгүй, иргэд орон нутагтаа шаардлагатай тусламж үйлчилгээгээ авч чадахгүйд хүрч байна.