Баянзүрх дүүргийн ИТХ-ын дарга А.Баяр, УИХ-ын гишүүн Э.Бат-Амгалан, "Илтгэх индрийн ирээдүй" ТББ нар хамтран дүүргийн хэмжээнд 100 залууг "Залуусаа дэмжье" хөтөлбөрийн хүрээнд сургагч багшийн хөтөлбөрт 4 дүгээр сараас эхлэн хамруулсан байдаг.

Хөтөлбөрт хамрагдсан залуучууд илтгэх урлаг, хувь хүний хөгжил, зөв төлөвлөлт, өөрийгөө зөв илэрхийлэх чадвар, баг хамт олноор ажиллах чадвар гэх мэт олон ур чадварыг эзэмших юм. Энэ хүрээнд өнөөдөр /2022.09.13/ нээлттэй өдөрлөг зохион байгуулж хөтөлбөрт хамрагдсан залуус 6 сарын турш эзэмшсэн ур чадвараа танилцуулжээ.

Энэ үеэр УИХ-ын гишүүн Э.Бат-Амгалан  "6 сарын дараа хөтөлбөрт хамрагдсан залуучуудтайгаа уулзахад хувь хүнийх нь тал дээр олон ахиц дэвшилтүүд гарсан нь харагдаж байна.  Өөрийгөө илэрхийлэхээс эхлээд биеэ авч явах, бусадтайгаа ойлголцох, харилцах, багаар ажиллах гээд маш олон төрлөөр чадвар эзэмшиж чаджээ.

Тиймээс миний бие уг хөтөлбөрийг цаашид үргэлжлүүлэх сонирхолтой байна.  "Mini Academy" байгуулж дүүргийн хороо бүрийн хүүхэд залуус, иргэдэд шаардлагатай сургалт, арга хэмжээг зохион байгуулахыг зорин ажиллана" гэв.

"Залуусаа дэмжье" хөтөлбөрийн хүрээнд хийгдэж буй сургагч багш хөтөлбөр ирэх 10 дугаар сард дуусна.