Соёл урлагийн ажилтны баярын өдрийг тохиолдуулан Нийслэлийн Соёл, урлагийн газраас их хотын хүүхэд залуустаа  #ТоонотUB тоглолтыг хамтран зохион байгуулалцан ажилласан.  Мөн “СОЁЛЫН ОРОН ЗАЙ" арга хэмжээ Денвэрийн гудамжинд өнгөрсөн амралтын өдрүүдэд амжилттай зохион байгуулагдлаа.

Арга хэмжээний талаар Соёлын сайд Ч.Номин “Хотжилтын тухай уламжлалт ойлголтоос салж, хүндээ ээлтэй, оюун санааны бүтээлч орон зайг бий болгохын төлөө олон улс орнууд нэгдэж байна. Үүнд соёл, урлагийн бүх талын бүтээлч сэтгэлгээг дэмжсэн орчныг өөр өөрсдийн нөхцөл, онцлогт тааруулан бий болгох нь чухал юм. 

Бодлогын хүрээнд гэр бүл, хүүхдүүдэд ээлтэй орчин орон зайг бий болгох, тэр дундаа соёлын орон зайг бүтээхийг уриалж байгаа бөгөөд Монгол улсад ч үүнийг хуульчлан тусгасан байдаг.  Энэ жилийн соёл урлагийн ажилтны өдрөөрөө бүхий л соёл, урлагийн ажилтнууд нэгдэн Нийслэлийн Сүхбаатар дүүргийн 7-р хорооны нутаг дэвсгэр, Денвэрийн гудамж - Сэлбэ голын эрэг дагуу байршлыг сонгон “Соёлын орон зай”-г бий болгох ажлыг өрнүүлж, уриалга гарган ажиллалаа” гэв. 

Дэлхийн улс орнууд бүтээлч байдлыг хотын хөгжлийн стратегийн гол хүчин зүйл гэж үзэх ёстой гэсэн үзэл баримтлалыг дэмжиж, ЮНЕСКО-гийн “БҮТЭЭЛЧ ХОТЫН СҮЛЖЭЭ”-нд нэгдсээр буй. ЮНЕСКО-гийн санаачилсан “Бүтээлч хотын сүлжээ” нь 2004 оны IX сард байгуулагдсан бөгөөд одоогоор дэлхийн 246 хотууд нэгдэн ороод байна. Энэхүү сүлжээг бүрдүүлж буй хотуудын хөгжлийн төлөвлөгөөний гол цөм нь бүтээлч байдал, соёлын үйлдвэрлэлийг хөгжүүлэх, олон улсын түвшинд идэвхтэй хамтран ажиллах юм.