Төрийн ордонд өнөөдөр /2022.05.16/ нам намын төлөөллүүд сонгуулийн тогтолцоо, Үндсэн хуулийн өөрчлөлтийн асуудлаар “гал гарсан” яриа өрнүүллээ. Хэлэлцүүлэгт,  алдарт “заргач” А.Отгонбаатар тэргүүтэй хэд хэдэн хүн үзэл бодлоо ширүүхэн илэрхийлээд амжсан. Өөрсдөө таван минут ярьчихаад, бидэнд дөрөвхөн минут өглөө” хэмээн ундууцан, байр сууриа илэрхийлсэн “Үнэн ба зөв” намын дарга А.Отгонбаатарын яриаг хүргэж байна.

Тогтолцоо ярихаар ойлгохгүй, дотоож, бандааш ярихаар ойлгож инээлддэг.

Тэрбээр “Би Төрийн ордныг гороолж мөргөсөн А.Отгонбаатар гэгч байна. Маргаашийн Монголыг засъя гэвэл өнөөдөр бид тэмцэх хэрэгтэй. Хэрэв бид тэмцэж чадахгүй бол тэгээд дуусаа. Өнөөдөр бүгдээрээ тогтолцооны өөрчлөлтийг ярьж байгаад нь олзуурхаж байна. Тогтолцооны өөрчлөлтийг хийнэ гэхээр манай ах нар их дургүй. Хулгай хийж, ард түмнээ хуураад, луйвардаад сурчихсан энэ тогтолцоогоо хэвээр нь авч үлдэхийн тулд үхэн хатан зүтгэж байна. Бид дэндүү тархиа угаалгачихаж. Тогтолцоо ярихаар ойлгохгүй, дотоож, бандааш ярихаар ойлгож, инээлддэг. Ийм ядуу сэтгэлгээтэй ардууд болчихсон байна. Тогтолцоондоо өөрчлөлт хийж, гишүүдийн тоог 200 давуулах хэрэгтэй. Ингэж байж, энэ парламент цэвэршинэ. Хэрвээ “байдаг л” УИХ-ын гишүүнийг сонгоод байх юм бол Н.Энхбаяр гуай энд, тэнд хүүхдээ дагуулаад гүйхгүй шүү дээ. Бизнесийн төлөөллүүд нь 5, 6 тэрбумаа цацаж, УИХ руу орж ирэхгүй.

Төр эрх мэдэлтэй, харин төрд байгаа хүн эрх мэдэлгүй байх ёстой.

Харин ард түмний зөв төлөөлөл 200 дотор орж ирвэл парламент чинь зөв болно. Төр эрх мэдэлтэй, харин төрд байгаа хүн эрх мэдэлгүй байх ёстой. Өнөөдрийн парламент эсрэгээрээ эргэчихээд байна. Ядаж намын дарга нараа парламентад орох үнэмлэхтэй болгочихоод, олон намын тогтолцоо гэж яриач.

Нэг зүйл онцолж хэлье. Ерөнхий боловсролын сургуулиа төгсөөд, 18 нас хүрсэн хүүхдүүдэд сонгогчдын боловсрол олгох хичээл оруулж өгмөөр байна. Саналаа өгөхгүй ард түмэн яаж дампуурдаг, саналаа өгсөн ард түмэн яаж хожсон гэдэг дэлхийн түүхийг ярьж өгөх хэрэгтэй. Тэгэхгүй бол нийгэм, залуучууд юм ойлгохгүй байна. Т.Доржханд гишүүнтэй би олон зүйл дээр санал нэгддэггүй ч энэ удаад “долоомоор” байна. С.Одонтуяа, Т.Доржханд гишүүд зоригтой явах хэрэгтэй. Ж.Мөнхбат гишүүн явах гээд байгаа юм шиг байснаа намынхнаасаа айгаад байх шиг болно лээ. Улс төрд сайн хэлүүлэх гэж биш, сайн зүйл хийх гэж яв” хэмээв.