Эрүүгийн Цагдаагийн албаны Эдийн засагтай тэмцэх газрын алба хаагчид энэ сарын 7-нд уржигдар шөнө нэр бүхий шөнийн цэнгээний газруудад шалгалтын ажиллагаа явуулсан талаар бид мэдээлсэн.

Улмаар тус цэнгээний газар үйлчлүүлж байсан иргэд болон ажилчдаас шинжилгээ авахад хоёр хүнээс мансууруулах бодис илэрсэн байдаг. Харин нэг иргэний биеэс мансууруулах бодис олдож хурааж авсан гэдгийг Цагдаагийн ерөнхий газраас мэдээллээд байна.

Эх сурвалжийн мэдээллээр, STYX, SQ бааранд шалгалтын ажиллагаа явуулсан байна. Мөн мансууруулах бодис хэрэглэсэн хоёр хүний нэг нь  Гаалийн ерөнхий газрын ажилтан байсан аж. 

Тэгвэл Сүхбаатар дүүргийн нутаг дэвсгэрт байрлах STYX, SQ /Square Lounge/ зэрэг шөнийн цэнгээний газруудыг хариуцан ажлуулдаг гэх Г-г татвараас зайлсхийсэн гэх үндэслэлээр цагдаагийн байгууллагаас шалгаж эхэлсэн талаар эх сурвалж мэдээллээ.

Мөн шалгалт хийх явцад тайчих үзүүлбэр үзүүлдэг эмэгтэйчүүдийн биеийг үнэлүүлэх явдал байсныг илрүүлсэн аж. Хэргийн талаар бид эргэн мэдээлнэ.

-Хэрэгт холбогдогчдын дийлэнх нь 16-35 насны залуус байсан аж-

Цагдаагийн ерөнхий газрын Хар тамхитай тэмцэх газраас өнгөрсөн долоо хоногт нийслэлийн дүүргүүд болон Төв аймгийн нутаг дэвсгэрт үйлдэгдсэн 25 холбогдогчтой 15 гэмт хэргийг илрүүлж, мансууруулах үйлчилгээтэй 27 кг 759 грамм ургамлыг эд мөрийн баримтаар хураан авч мөрдөн шалгах ажиллагааг явуулж байна.

Холбогдогчдын дийлэнх нь 16-35 насны залуус байсан аж. Хэрэгт холбогдогч этгээдүүд байгалийн гаралтай болон нийлэгжүүлсэн синтетик бодисыг хууль бусаар олж авч, хадгалж байсан үйлдлүүдийг ийнхүү илрүүлж, хууль бус үйлдлийг нь таслан зогсоож ажиллажээ.

Энэ төрлийн гэмт хэрэг үйлдсэн этгээдэд Монгол Улсын Эрүүгийн хуулийн 20.7 дугаар зүйлийн 20.7.1 дэх хэсэгт “Хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, хадгалсан, бусдад өгсөн, олж авсан бол 1-5 жил хүртэл хугацаагаар зорчих эрхийг хязгаарлах, эсхүл 1-5 жил хүртэл хугацаагаар хорих ял шийтгэнэ” гэж заасан байдаг бол “Мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгоор хууль бусаар олж авсан, бэлтгэсэн, боловсруулсан, хадгалсан, тээвэрлэсэн, илгээсэн, худалдсан бол 2-оос 8 жил хүртэл хугацаагаар хорих ял шийтгэнэ” гэж заасан байна.