Эмээлт дэх махны үйлдвэр махандаа ямар нэг химийн бодис хольсон байж болзошгүй тухай мэдээлэл гарч, хууль хяналтын байгууллагууд шалгаж, махнаас дээж аваад буй. Одоогоор албаны ёсны шинжилгээний хариу гараагүй байгаа юм. 

Асуудалд нэр холбогдсон үйлдвэрийн тухайд, "Эм Ди Си Пи" гэх Хятадын хөрөнгө оруулалттай компанийнх ажээ. Гэвч бэлтгэж байсан мах, махан бүтээгдэхүүн дээр "ХКҮ" буюу "Хиам консервны үйлдвэр"-ийн шошго байсан төдийгүй энэ нь “Мах Импекс” компанийн салбар үйлдвэр гэх мэдээлэл зарим хэвлэлээр гараад байгаа юм.

Тэгвэл "Мах Импекс" ХК-иас уг мэдээллийг үгүйсгэж, дээрх үйлдвэртэй огт хамааралгүй гэдгээ мэдэгджээ. Мэдэгдэлдээ, "СХД-ийн 32 дугаар хороонд байрлах БНХАУ-ын хөрөнгө оруулалттай "Эм Ди Си Пи" компанийн эзэмшлийн махны үйлдвэрт Мэргэжлийн хяналтын газраас хяналт шалгалт хийж, уг шалгалтын үеэр "Мах Импекс" ХК болон "ХҮК" ХХК-ийн бүтээгдэхүүний шошго, барааны тэмдэг ихээр олдсон байна. Өөрөөр хэлбэл, манай компанитай ямар нэг гэрээ хэлцэл хийлгүйгээр хаяг, шошго, барааны тэмдгийг ашиглаж, хэрэглэгчдийг хууран мэхэлж, бусдыг төөрөгдүүлсэн байна. Тиймээс бид хуулийн байгууллагад шалгуулахаар хандсан болно" хэмээжээ.