Эргэх улирлын жамаар алтан намар айлчлан ирэхэд сургууль, цэцэрлэг эрдмийн үүдээ нээнэ. Жил бүрийн есөн сарын нэгэнд хүн бүр баяр жаргалаар дүүрэн байдаг. Тэгвэл энэ жилийн хувьд  хичээлийн шинэ жилийг хүн бүхэн баяр дүүрэн угтахгүй нь бололтой.

Учир нь Их, дээд сургуулийн мэдлэг олгох түвшинд тэнцэхгүй гэж үзсэн сургуулиудын үйл ажиллагааг БСШУ-ны яамнаас зогсоогоод байгаа. Тэдгээр сургуульд суралцаж байсан оюутнуудын хувьд эрдмийн баярын энэ өдөр нөхцөл байдал хүндхэн байгаа биз ээ. Бид энэ сэдвийн хүрээнд буюу татан буугдсан сургуулиудын нөхцөл байдлыг сурвалжиллаа.

Татан буугдсан дээд сургуулийн багш, оюутнууд хүнд байдалд байна

Монгол Улсын Засгийн газрын тогтоол, Боловсрол, шинжлэх ухааны сайдын тушаалаар 13 сургуулийн сургалтын үйл ажиллагааг зогсоож, 8 сургуулийг бусад сургуулийн харьяанд шилжүүлж нэгтгэсэн талаар бид өмнө нь мэдээлсэн.

Тэгвэл татан буугдсан их сургуулиудын багш нар хийгээд оюутнууд хүндхэн нөхцөл байдалд байна.

Учир нь сургууль татан буугдахыг хүлээж байсан аятай маргааш нь өөр сургуульд шилжиж, суралцаж, ажилладаг багш оюутнууд гэж хаа ч байхгүй.

Тухайлбал, оюутнууд хаана сурахаа бодож, харин багш нар ажилгүйчүүдийн эгнээнд шилжиж байна. Зарим оюутнуудын хувьд сургуулиа орхих, жил алдах тохиолдлууд ч гарч байгааг эх сурвалж онцолж байлаа. Харин сургуулийн удирдлагууд зохих арга хэмжээнүүдийг цаг алдалгүй авч ажиллахыг хичээж байгаа бололтой.

Манай сурвалжлах баг татан буугдсан Монголын Хүний Нөөцийн Удирдлагын Дээд Сургуулийн өнөөдрийн  /2022.09.01/ нөхцөл байдалтай танилцлаа. Тус сургуулийн хувьд оюутнуудаа "Этүгэн" их сургууль, "Их Засаг" их сургууль руу нэгдсэн журмаар шилжүүлж байгаа ажээ. Харин багш ажилчдын тухайд бусад боловсролын байгууллагуудад хүсэлтээ өгөөд байгаа талаар сургуулийн нэр бүхий ажилтан онцоллоо.

Гэхдээ багш нар оюутнуудынхаа шилжсэн сургуульд ажиллах хүсэлтэй байгаа гэв.

Монголын Хүний Нөөцийн Удирдлагын Дээд Сургууль нь байгуулагдаад таван жил болж байсан. Энэ хугацаанд 30 орчим багш, ажилчинтайгаар үйл ажиллагаагаа явуулж байжээ. Өдгөө 200 гаруй оюутантай. Өнгөрсөн жил л гэхэд 50 гаруй оюутан амжилттай төгсгөжээ.

Мөн тус сургууль дэргэдээ Хүний Нөөцийн Удирдлагын Шинэчлэлийн Академитай. Энэхүү академидаа үйлчлэгч, харуул гэх мэт үйлчилгээний ажилчдаа авч үлдэж байгаа аж.

Биднийг очиход сургууль бүхэлдээ хаагдсан, нам гүм байдалтай байлаа. Бүр сургуулийн нэг давхарт үйл ажиллагаа явуулж байсан GS25 сүлжээ дэлгүүр ч хаалгаа "барьжээ".  Яг хажууханд нь дээрх нэр бүхий академи байрладаг. Академийн үүдэнд нөхцөл байдлыг тодруулах гэсэн, бичиг баримтаа авахаар ирсэн, шилжих хүсэлтээ өгч байгаа зэрэг арав хүрэхгүй оюутан сууж байх юм. Ажиглаваас, гурав, дөрөвдүгээр курсын оюутнууд бололтой. Ганц нэгхэн шинэ оюутан харагдана.

Оюутнуудтай уулзаж нөхцөл байдлыг тодруулахын зорьсон ч зарим нь бухимдсан, ичиж нэрэлхсэн байдалтай яриа өгөхөөс илт татгалзсан. Харин төгсөх ангийн зарим оюутнууд “Сургууль маань гэнэт үйл ажиллагаагаа зогсоож, хаагдахад  шооконд орсон. Өөр сургууль руу шилжинэ гэхээр муухай санагдаж байгаа ч нэгэнт ийм зүйл болсон хойно шилжихээс өөр аргагүй. Гэхдээ бид бүхэн сургууль маань хаагдах хэмжээний муу сургууль байсан гэж бодохгүй байна. Сургалтын төлбөрөө хараахан төлөөгүй байсан. Төлсөн байсан ч төлбөрөө буцааж авахад асуудалгүй байгаа. Өөр сургууль руу шилжүүлэх тал дээр сургуулийн зүгээс анхаарч байна” гэдэг мэдээллийг өглөө. Түүнчлэн сургуулиас шилжүүлж байгаа сургууль нь таалагдаагүй тохиолдолд оюутнууд өөрсдийн хүсэлтээр бичиг баримтаа авч байгаа аж.

Татан буугдаж, хаагдсан сургуулийн эргэн тойронд нам гүмхэн, бухимдсан ажилтан, албан хаагчид, ойр орчимд нь таарсан цөөн хэдэн оюутны харц нэг л гунигтай байлаа.