Бяцхан үрс эрдмийн өргөөнд алхаж орох анхны өдөр ийн тохиож байна.

Хүн бүрт эрдэм номд тэмүүлэхийн баяр жаргалыг мэдрүүлдэг энэ өдөр хүүхэд, оюутан залуус, багш сурган хүмүүжүүлэгч бүрийн хүсэн хүлээж, догдлон угтдаг өдөр билээ.

Дэлхий нийт мэдлэгийн нийгэмд шилжиж, мэдлэг шингэсэн бүтээгдэхүүнийг олон улсын зах зээлд гарган мэдлэгийн эдийн засгийг бэхжүүлэн хөгжиж байна. Тэр утгаараа боловсролын чанарын шинэчлэл, эрхэм зорилгыг хүүхэд бүрт хүргэж, бүтээлч, шийдвэр гаргах чадвартай иргэн болгон төлөвшүүлж, дэлхийд өрсөлдөх “Монгол оюун”-ыг бойжуулахын төлөө Монгол Улсын Боловсролын бодлогын цөм чиглэж байгаа. Дэлхийн “Боловсролын алсын хараа” 2030 он хүртэл нэгдсэн зорилго, хүсэл эрмэлзэлтэй, хүн бүрт хүрсэн боловсролын хөтөлбөрийг боловсруулахад чиглэсэн.

Чанартай боловсрол нь бүтээмж болон мэдлэгийг хөгжүүлж, задлан шинжилгээ хийх, асуудал шийдвэрлэх, танин мэдэхүйн чадвар, хувь хүний хөгжил буюу хүн болж төлөвших харилцааны чадваруудыг хөгжүүлдэг. Тиймээс багш сурган хүмүүжүүлэгч Та бүхэн “Тогтвортой хөгжил, эдийн засгийн нөөцийн хамгийн чухал хүчин зүйл, үр ашиг, өрсөлдөх чадварыг дээшлүүлэх үндэс” хэмээн харж сургалт, судалгаа, инновацийг хөгжүүлэн, соёлын үрийг хүүхэд залуустаа түүчээлэн түгээнэ гэдэгт итгэлтэй байна.

Сонгинохайрхан дүүргийн иргэдийн Төлөөлөгчдийн Хурлын даргын хувьд “Ээлтэй Ирээдүй” аяныг санаачлан мэргэжлийн байгууллагуудтай хамтран хэрэгжүүлж байгаа. Энэхүү аянаараа хүүхэд, багачуудад ээлтэй орчныг бүрдүүлэх, сурч боловсрох эрүүл, аюулгүй орчныг бий болгохоор ажиллаж байна.

СХД-ийн нийт Сурагчид, Цэцэрлэгийн багачууд, Оюутан залуус, Багш сурган хүмүүжүүлэгчид болоод Боловсролын салбарт ажиллаж байгаа нийт ажилтан, албан хаагчид Та бүхэндээ Хичээлийн Шинэ жилийн мэндийг дэвшүүлж, сурлагын өндөр амжилт гаргахыг хүсэн ерөөе!

СХД-ийн ИТХ-ын дарга Б.Хуягбаатар