Үндсэн хуулийн нэмэлт, өөрчлөлтийн дагуу Засгийн газрын сайд нар давхар дээлтэй байхаар болж, УИХ-ын 10 гишүүн сайдаар томилогдов. Тэд тангарагаа өргөж, үүрэгт ажилдаа орлоо.

Бид шинээр томилогдсон давхар дээлтэй сайд нарын 2021 оны хөрөнгө орлогын мэдүүлэгтэй танилцаж, "хамгийн хамгийн"-ийг онцлон хүргэж байна.

ХОМ-ТЭЭ ГАЗРАА ХАМГИЙН БАГААР ҮНЭЛСЭН ХОЁР САЙД

Нийслэл хот, түгжрэлийг бууруулах асуудал хариуцсан сайдаар Ж.Сүхбаатар томилогдсон. Түүний хувьд яамгүй сайд.

2021 оны хөрөнгө орлогын мэдүүлгээс нь харахад,   20 саяар үнэлэгдэх 700 метр квадрат газартай гэж мэдүүлсэн нь сонирхол татаж байна.

Гэхдээ 10 сая төгрөгийн үнэ бүхий нэг га газартай Спорт, олимпизм хариуцсан сайд Б.Бат-Эрдэнийн хажууд өндөр дүн хэлжээ.  Хамгийн сонирхолтой нь энэ хоёр сайдын хадгаламжийн дүн их төстэй. Ж.Сүхбаатар 79 сая 858 мянга, харин Б.Бат-Эрдэнэ сайд  74 сая 125 мянган төгрөгийн хадгаламжтай.

БИЙЛЭГЖҮҮ Ч ХАМГИЙН ДАРУУХНААР ХОМ-ЭЭ ӨГСӨН САЙД

Яамдын сайд нарын “толгойлогч”-оор нэрлэгдээд байгаа Ч.Хүрэлбаатарыг учир мэдэх хүмүүс нэлээн бийлэгжүү хүн гэлцдэг. Гэвч тэрбээр аль болох даруухан, энгийн байдлаар өөрийгөө ойлгуулахыг зорьдог бололтой юм. Энэ Засгийн газарт Эдийн засаг, хөгжлийн сайдаар ажиллах болсон нь ч түүнийг улстөрийн хэр тоглогчийг илтгэж байгаа байх. Тогоондоо ч, толгойгоороо ч “толгойлогч” болчихоор  Ч.Хүрэлбаатар хоёр сая төгрөгийн газар, 15 сая төгрөгийн үнэт эдлэлтэй гэж мэдүүлжээ. Мөн болоогүй  Эрдэнэс Тавантолгой ХК-ийн 1072 ширхэг хувьцаатай.

ТЭРБУМААР ҮНЭЛЭГДЭХ ОРОН СУУЦ, ТЭРБУМ ТЭРБУМЫН АВЛАГАТАЙ САЙД

Дарханы замаар тоглолт хийсээр байгаад сайд болчихсон гээд хэлчихвэл хэлсдэхгүй С.Бямбацогт өдгөө Зам тээврийн хөгжлийн сайдаар ажиллах юм.

Тэрбээр гурван тэрбум 871 сая төгрөгийн таван орон сууц, үйлчилгээний зориулалттай нэг обьект, гурван авто зогсоолтой. Хоёр биш 200 сая төгрөгийн үнэ бүхий газартай. Дөрвөн тэрбум 964 сая төгрөгийн авлагатай. Овоо хэдэн томоохон компаниудад хувьцаа эзэмшигч. Бас болоогүй малтай.

ӨГӨХӨӨС ИЛҮҮ АВДАГ, ХУРИМТЛУУЛДАГ САЙД

Уул уурхай, хүнд үйлдвэрийн сайд Ж.Ганбаатар бусдаасаа хамгийн өндөр хадгаламжтай. Өнгөрсөн жилийн Хөрөнгө орлогын мэдүүлгээс нь харвал 6.5 тэрбум шахуу хадгаламжтай. Жинхэнэ цуглуулагч, хураагч байгаа биз. Мөн дээрээс нь 100 хүртэлх хувийн хувьцаатай таван компани байдаг. Авлага байхгүй.

Түүний араас Хүнс, хөдөө аж ахуй, хөнгөн үйлдвэрийн сайдаар томилогдсон Х.Болорчулууныг нэрлэж болно. Гэхдээ Ж.Ганбаатарыг хадгаламжаараа яагаад ч гүйцэхгүй. Товчхондоо, 1.3 тэрбум төгрөгийн хадгаламжтай. Өөрөөр нь овоглосон “Дорнод гурил” ХХК-д ТАВХАН хувь эзэмшдэг.

ХАДГАЛАМЖИНД БИШ ХУВЬЦААНД ХУРИМТЛАЛ ҮҮСГЭСЭН САЙД

Эрчим хүчний сайд Б.Чойжилсүрэнгийн орлого, үл хөдлөх хөрөнгө, мал, эд зүйл дотор хүний нүд бүлтийлгэм дүнтэй зүйл бараг л байхгүй. Бүр хадгаламж нь ч тэрбумтангуудын хажууд шалихгүй. Гэхдээ тэр маш сайн хувьцаа эзэмшигч. Бараг бусад сайд нараасаа хамгийн олон компанид хувьцаа эзэмшдэг нь гээд хэлчихвэл хэлсдэхгүй.

“Хос гэрэлт” авто сервис ХХК, “Сауд гоби петро ойл транс”  ХХК, “Кэй Би тауэр пропертис” ХХК, “Хаус инвест такс” ХХК, “Рапид харш” ХХК, Хурд Авто ХХК, Хурд групп ХХК, Хурд Хүнс ХХК, Цэнхэр гантиг ХХК зэрэг 30 гаруй компанийн 100 хүртэлх хувийг эзэмшдэг.