Засгийн газрын шинэ бүрэлдэхүүнд АН-аас орно, 1-2 суудлын тохироо хийсэн гэхчлэн мэдээллүүд цацагдаад байсан ч сайд нарыг томилох агшинд АН-аас нэг ч хүний нэр цухалзсангүй. 

Энэ талаар УИХ-ын гишүүн Б.Пүрэвдорж “АН-ын гишүүдийг засагт оруулж ажиллуулъя гэдэг яриа яваад байна. Ямар салбарт нь яаж ажиллах юм бэ. АН-ын гишүүд дотор маш их хуваагдал бий болгож байна. Нэг болохоор хамтарсан засагт оруулах тухай манай бүлгийн дарга яриад байдаг. Гэтэл танай бүлгийн дарга АН-тай ярьсан зүйл байхгүй гэж ярьж байгаа нь асуудалд итгэлтэй хандах боломж өгөхгүй байна” гэдэг зүйлийг өчигдрийн /2022.08.30/ УИХ-ын ТББХ-ны хуралдааны үеэр Ерөнхий сайд Л.Оюун-Эрдэнээс шууд л тулгаж асуув.

Харин түүний асуултад Л.Оюун-Эрдэнэ “Зөвхөн МАН гэхгүй “Шинэ сэргэлтийн бодлого"-ыг дэмжиж байгаа аль ч нам, хөрөнгө оруулагчтай идэвхтэй хамтран ажиллана. Гэхдээ хамтарсан Засгийн газрын асуудлаар албан ёсоор Удирдах зөвлөлд ярьсан зүйл байхгүй. Урагшилна гэвэл том төслүүдэд улс төрийн ямар ч шийдвэр гаргахад би эрх баригч намын даргын хувьд нээлттэй байгаагаа илэрхийлж байна. Ямар байдлаар ойлгогдоод хэвлэлээр явж байгааг харж амжсангүй” гэсэн юм.

Өөрөөр хэлбэл, АН-ынхан албаар тийм мэдээлэл тарааж, "битүү" горьдлого тээж байжээ. Харин Б.Пүрэвдорж түүн дээр нь тоглолт хийх гээд амруугаа алгадуулж буй дүр зураг өчигдрийн хуралдаан дээрээс ажиглагдав.