Ойрын үед С.Эрдэнэ болон түүний тойрон хүрээлэгчид өөрсдөөсөө бусдыг ямар нэг шалтаг шалтгаан хэлж, намаасаа хөөсөөр байгааг уншигчид харж байгаа биз ээ.

Угтаа УИХ-ын гишүүдийг тойргийнх нь сонгогчид хийгээд ард түмэн итгэл хүлээлгэж, томилдог.  Гэтэл  намын дарга гэх хүмүүс “өөрсөдтэйгээ нь ирж уулзсангүй, хэлсэн шийдвэрийг нь дагасангүй” гэж дарамтлах болжээ. Тэр тусмаа сүүлийн хэдэн жил УИХ-д сонгогдсон АН-ын нүүр тахалж байгаа хэдэн гишүүдээ ад үзэж, ээлж дарааллан хөөсөөр байгаа С.Эрдэнэд намынхан нь шүүмжлэлтэй хандаж байна.

Бидэнд ирсэн мэдээллээр,  УИХ-ын дэд дарга, УИХ-ын гишүүн С.Одонтуяаг мөн л дээрх шалтгаанаар шалтаглан намаас нь хөөх шийдвэрийг гаргаад байгаа аж.

Угтаа УИХ-ын дэд даргын эрх үүрэг нь намын дүрмээр биш улсын хуулиар явах учиртай. Гэтэл тэр эрх үүргийг нь намаас нь болиулж, өөрийг нь үг дуугүй дагасангүй гэдэг байдлаар хандах нь хэр зохимжтой юм бол.

Иргэдийн толгой угаасан энэ шоугаа АН-аас Нийслэлд сонгогдсон ганц гишүүндээ хэрэглэж байгаа нь С.Эрдэнэ болоод түүний нөхөд ямар увайгүй, АН-ын хагарал дээд цэгтээ тулсан байгааг илтгэх.  

Энэхүү мэдээллийг бататгаж байгаа аятай өнөөдөр /2022.08.29/ С.Эрдэнэ тэргүүтэй хүмүүс намаасаа УИХ-ын гишүүн Ц.Туваан, О.Цогтгэрэл, С.Одонтуяа, Б.Бейсен нарыг 8 жилийн хугацаатайгаар хөөсөн талаараа мэдээлэв. Улмаар өмнө нь хоёр гишүүн хөөсөн, одоо дөрвөн гишүүн хөөгдөж байгаа учир УИХ дахь АН-ын гишүүд бүлэг байгуулах тоонд хүрэхгүй учир бүлгээ татаж буйгаа мэдэгдэв. Уг асуудлыг УИХ-ын дарга Г.Занданшатарт хүргүүлэх гэнэ. УИХ-ын гишүүдийн бүрэн эрх, парламентийн дэг жаяг гэхчлэн юу ч С.Эрдэнэ нарт нөлөөлдөггүй бололтой.