МАН-ын Удирдах зөвлөлийн хурал өнөө өглөө хуралдахаар гишүүддээ зар тараасан ч хойшилсон гэх мэдээлэл байна. Харин үүнээс өмнө бүлгийн хурлаа хийхээр болжээ.

Засгийн газрын бүтэц болон сайдуудын томилгоотой холбоотой чухал шийдвэрүүд өнөөдөр эсхүл маргааш гарах нь дамжиггүй. 
Тодруулбал, ҮХЦ-ээс УИХ-ын дөрвөөс илүү гишүүн Засгийн газарт сайд хийж болно гэх шийдвэр гаргасан билээ.

Эх сурвалжуудын мэдээлж буйгаар Ерөнхий сайд Л.Оюун-Эрдэнэ өнөөдөр Засгийн газрын бүтцээ танилцуулж,  сайд нараа томилох юм.  

Одоогоор  Eрөнхий сайд Л.Оюун-Эрдэнэ Ардчилсан намд 1-2 сайдын суудал өгч улс эх орныхоо төлөө танхимдаа орж ажиллахыг санал болгосон гэх мэдээлэл байна.

Мөн ХЗД-ийн сайд Х.Нямбаатар, БШУ-ны сайд Л.Энх-Амгалан Сангийн сайд Б.Жавхлан нарыг үлдээж байгаа бол дан дээлтэй сайд нараасаа Соёлын сайд Ч.Номин, БОАЖ-ын сайд Б.Бат-Эрдэнэ ГХ-ны сайд Б.Батцэцэг нарыг үлдээсэн гэх.

Ямартаа ч Ерөнхий сайд Л.Оюун-Эрдэнэ анх удаа багаа бүрдүүлж байгаа юм байна. Түүний хувьд 2021 оны Ерөнхийлөгчийн сонгуулийн өмнө У.Хүрэлсүхийн бүрдүүлсэн засгийн газрыг шууд тэргүүлж ажилласан. Тиймээс энэ удаа өөрөө багаа бүрдүүлэх боломжоо ашиглаж эв эеийг эрхэмлэсэн, гадаад нөхцөл байдлыг харгалзаж шинэ сэргэлтийн бодлогыг хэрэгжүүлэх зорилгоор бүтэц, бүрэлдэхүүнээ оруулж ирж байгаа аж.

Ерөнхий сайдын авч хэрэгжүүлж буй Эдийн засгийн тусгаар тогтнолын төлөөх “Зууныг эхлүүлэх зургаан сэргэлт”-д
НЭГ. Боомтын сэргэлт
ХОЁР. Эрчим хүчний сэргэлт
ГУРАВ. Аж үйлдвэржилтийн сэргэлт
ДӨРӨВ. Хот, хөдөөгийн сэргэлт
ТАВ. Ногоон хөгжлийн сэргэлт
ЗУРГАА. Төрийн бүтээмжийн сэргэлт зэргийг нэрлэж байгаа. Тэгэхээр эдгээр бодлогыг хамгийн сайн баримталж, хэрэгжүүлж чадсан нь дээрх сайдууд бололтой юм. Тэр утгаараа үлдээх шийдвэрийг гаргаад байгаа талаар улс төрийн орчинд яригдаж байна. 

Ерөнхий сайдын хувьд Шинэ сэргэлтийн бодлогоо дэвшүүлснийхээ дараа “Монгол Улсын Үндэсний аюулгүй байдлын зөвлөлийн гишүүд Монгол Улсын Ерөнхийлөгч, Монгол Улсын Их хурлын дарга, Ерөнхий сайд нар хөгжлийн бодлогыг нэгэн цонхоор харж, Их бүтээн байгуулалтыг өрнүүлэх алдаж үл болох алтан боломж 12 жилийн дараа ийнхүү тохиож байна” хэмээж байв.