Цэцэрлэгийн нэгдүгээр шатны бүртгэлийн үр дүнд цахимаар 111,542 хүүхдийг цэцэрлэгүүдэд хуваарилсан тухай БШУЯ мэдээлсэн.

Хүсэлтийг цахимаар авч, хуваарилалт хийж дууссантай холбогдуулан цэцэрлэгийн хуваарилалтын талаар БШУЯ-наас тодрууллаа.

- Түр оршин суугчдын хүүхэд цэцэрлэгт хэрхэн хамрагдах боломжтой вэ?

- Хуваарилалтын дараа сул суудал гарсан цэцэрлэгүүдэд нэмэлт элсэлт зохион байгуулах боломжтой.

- Хуваарилагдсан цэцэрлэгтээ очсон боловч багтаамж байхгүй гээд авахгүй бол яах вэ?

- Ийм асуудал үүсэх ёсгүй. Нэг ангид 40-өөс хэтрэхгүй хүүхэд суралцахаар тооцож зохицуулалт хийсэн.

- Хүүхдүүд гэртээ хамгийн ойр байрлах цэцэрлэгт хуваарилагдаж чадсан уу?

- Энэ удаа системийн тусламжтайгаар хуваарилалт хийгдсэн.

Гэрт нь хамгийн ойр цэцэрлэгийн багтаамж дүүрсэн тохиолдолд үлдсэн хүүхдүүдийг ойролцоох бусад цэцэрлэгт хуваарилсан.

Гэрээ байгуулсны дараа хэрэв нэмэлтээр хүүхэд хүлээн авах багтаамж гарвал хоёрдугаар шатны бүртгэлийн үеэр зохицуулалт хийх боломжтой.

- Нэг айлын хүүхдүүд өөр өөр цэцэрлэгт хуваарилагдсан тохиолдолд яах вэ?

- Систем автомат хуваарилалт хийхдээ таван настай хүүхдүүдээс эхэлж цэцэрлэгт хуваарилсан учраас нэг айлын хүүхдүүдийг ялгаж таниагүй болно. Тиймээс хүүхдээ хамруулах хүсэлтэй байгаа цэцэ рлэгт хандан өргөдөл гаргана.

Цэцэрлэг хооронд шилжилт хийх боломжийг нэгж дээр шийдвэрлэнэ.

- Хувийн цэцэрлэгт хуваарилагдсан хүүхдүүд төлбөр төлөх ёстой юу?

- Цэцэрлэг бүр харилцан адилгүй төлбөртэй. Төрөөс хүүхдийн хувьсах зардлыг хоёр дахин нэмэгдүүлж олгон, хоолны мөнгө нэмэлтээр өгөхөөр шийдвэрлэсэн.

Энэ дэмжлэгийн дараа тухайн цэцэрлэгийн төлбөрт зөрүү гарвал эцэг эх, асран хамгаалагчтай харилцан тохиролцож зөрүүг тооцож авахаар зохицуулалт хийсэн.

- Нэг ангид хэдэн хүүхэд хичээллүүлэхээр тооцоолсон бэ?

- Нэг хүүхдэд ногдох талбайг 5.6м² байсныг 4м² болгож буулгасан.

Нэг бүлэгт байх хүүхдийн тоог 40-өөс хэтрүүлэхгүй байхаар хуваарь хийсэн.

- Хүүхдийн шээс, цагаан хорхойн шинжилгээг хаана өгөх вэ?

- Лабораторийн шинжилгээний хариу сөрөг буюу эрүүл тохиолдолд цэцэрлэгт хүүхдийг хүлээж авна. Магадлан итгэмжлэгдсэн дурын лабораторийн шинжилгээний хариуг хүлээн зөвшөөрнө.