Баянгол дүүргийн удирдлагуудын авлига, албан тушаалын "завшсан" хэргүүд ар араасаа хөвөрсөөр. Ялангуяа УИХ-ын гишүүн Ж.Ганбаатарыг өөрийн хамаарал бүхий этгээдүүдээ дүүргийн бүхий л алба, хэлтсүүдэд “шургууллаа” гэх мэдээллүүд хэвлэлийн хуудсыг чимэх болов.

Тэгвэл, Баянгол дүүрэг "Шинэ-Өргөө" ОНӨААТҮГ-ын даргаар өөрийн дотны найз Ж.Галтбаярыг томилсон тухай мэдээлэл бидэнд ирлээ. Эх сурвалжийн мэдээлснээр Ж.Галтбаяр нь ажлаа авмагцаа төрсөн дүү Ж.Сайнбаяраа ажилд авсан байна. Мөн өдгөө дүүргийн ИТХ-ын төлөөлөгч, өмнө нь УИХ-ын гишүүн Ж.Ганбаатарын туслахаар ажиллаж байсан Б.Батзоригийг өөрийн нэгдүгээр орлогч даргаараа томилжээ.

Миний дүү манай байгууллагад ажилладаг нь үнэн.

Энэ талаар Ж.Галтбаяртай холбогдож тодруулахад “Миний дүү манай байгууллагад ажилладаг нь үнэн. Гэхдээ зүгээр цалин авч явдаггүй. Шалгадаг хүмүүс нь ирээд шалга. С.Эрдэнийг БГД-т байхад хамгаалагчаас нь эхлээд бүгд л ойрынх нь хүмүүс байсан. Сэвээд байх шаардлагагүй” гэдэг зүйлийг ярьсан юм.

Ж.Галтбаярын удирддаг “Шинэ-Өргөө” ОНӨААТҮГ нь зөвхөн он гарснаас хойш Баянгол дүүргийн Засаг даргын тамгын газраас хог хаягдал, зам талбайн цэвэрлэгээнд зориулж доорх төсвийг захиран зарцуулжээ.

Тухайлбал,

-1 дүгээр сард, 400 орчим сая төгрөг

-2 дугаар сард, хагас тэрбум буюу 500 гаруй сая төгрөг

-3 дугаар сард, 400 орчим сая төгрөг

-4 дүгээр сард мөн ийм хэмжээний төсвийг авчээ. Үүнээс гадна Нийслэлийн Засаг даргын тамгын газраас зам цэвэрлэгээнд тодорхой төсвийг гаргуулж авдаг байна.

Бид “Улс төрчдийн ургийн мод” эрэн сурвалжлах нэвтрүүлгээрээ Баянгол дүүрэгт үүсээд буй энэ мэт нөхцөл байдлыг эргэн мэдээлнэ.