Ус сувгийн Удирдах газрын дарга Ц.Төрхүү гэж “уснаас хуурай гардаг”нэг хүн бий. Өнгөрсөн жил  “Иргэдийн төлсөн ус, цахилгааны мөнгөнөөс цувчуулсан” гэх асуудалд нэр холбогдож байсан ч хамааралгүй гээд өнгөрчихсөн. Дүүргийн мэргэжилтнээс дэвшсээр УСУГ-ын дарга, цаашлаад НИТХ-ын төлөөлөгчөөр гурвантаа сонгогдсон түүнийг Ц.Сандуйгийн ойрын хүн гэдэг. Тэрбээр Ц.Сандуйг Нийслэлийн газрын албаны дарга байхад орлогчоор нь ажиллаж байсан юм. 

Харин өнөөдөр УСУГ-ын дарга Ц.Төрхүү хоёр давхар “шавар” барилгаа шилэн харшаар сольж, дэргэдээ хүртэл “Дусалхүү” гээд цэцэрлэг барьж, байгууллагынхаа төсвийн “бяр”-ыг шалгаж байна.

Тэгвэл check.mn сайт төсвийн хэмнэлт хэрхэн хэрэгжиж буйг тандахаар “Шилэн төсөв” буландаа УСУГ-ын төсвийн зарцуулалттай холбоотой зарим анхаарал татсан мэдээллийг онцолж байна. 

“СОД МОНГОЛ”-ЫН СПОНСОР

Улаанбаатар хотын “Ус сувгийн Удирдах газар”  ОНӨААҮГ 2022 он гарснаас хойш буюу дөрөвхөн сарын дотор УИХ-ын гишүүн Ц.Анандбазарын тодотголтой  “Сод монгол групп” ХХК руу  1 тэрбум орчим төгрөгийг зөвхөн шатахууны төлбөрт шилжүүлжээ. Сарын эхэнд болон сүүлээр шатахууны үнэ зарлага гарсан байгааг доорх шилэн дансанд байршуулсан мэдээллээс нь харж болно.

Энэ оны нэгдүгээр сард нэг өдрийн дотор гэхэд л 150 гаруй сая төгрөгийг шатахууны үнэ нэрийдлээр “Сод Монгол групп” ХХК-руу шилжүүлсэн байгаа юм. Мөн хоёрдугаар сарын 28-ны өдөр 114 сая, 43 сая төгрөгийн хоёр удаагийн зарлагыг гүйлгээг тус компани руу шилжүүлсэн байна. Энэ мэтчилэн сар бүр хоёр удаагийн гүйлгээг нэг өдөрт гаргажээ.

200 ГАРУЙ САЯ ТӨГРӨГӨӨР НЭГ ӨДРИЙН ДОТОР ХОЁР МАШИН ХУДАЛДАН АВЧЭЭ

Мөн хэмнэлтийн горимд шилжсэн энэ үед нэг өдрийн дотор хоёр ч машин худалдаж авсан нь эрхгүй анхаарал татав.  “Старекс” маркийн автомашин 132 сая төгрөгөөр “Эм И Си Ти Эс” ХХК-иас хэдхэн хоногийн өмнө буюу өнгөрсөн дөрөвдүгээр сарын 21-нд худалдан авчээ.   

Яг энэ өдрөө “УАЗ Фермер” маркийн автомашин 74.955.000 сая төгрөгөөр худалдан авчээ.  Тэр ч бүү хэл 21 сая төгрөгийн саван, 37 сая төгрөгийн угаалгын нунтаг, 17 сая төгрөгийн цэвэрлэгээний материал худалдан авсан байгаа юм. Эдийн засгийн хямралтай энэ үед дээр, дооргүй бүсээ чангалж, хэмнэлтийн горимд шилжчихээд байхад зах зээлийн үнээс даруй өндөр үнээр худалдан авалтууд хийсэн нь анхаарал татаж байна. 

Тэрчлэн он гарснаас хойш усны хэрэглээний төлбөр нэмэгдэж, задгайгаар төлдөг өрхүүд нэг хүний 71 мянган төгрөг, тоолууртай өрхүүд дунджаар 60-150 мянган төгрөг төлж буй. Өөрөөр хэлбэл, иргэдэд нэмэгдсэн төлбөрүүд дарамт учруулж, түүнийгээ төлөх гэж мачийж байхад УСУГ-ынхан саван, нойлын цаасаа сая саяар үнэлж аваад, өдөрт л 100 гаруй сая төгрөгийн гүйлгээ хийж байгаа нь хэр зүйд нийцэх вэ?