Олимпийн аварга Н.Түвшинбаярт холбогдох хэргийн шүүх хурал тодорхойгүй хугацаагаар хойшиллоо.

Энэ талаар Н.Түвшинбаярын өмгөөлөгч Л.Данзанноров "Бэлтгэл шүүгч Д.Доржсүрэнгийн зүгээс шүүх хурлаас татгалзах хүсэлт гаргасан. Тиймээс хэрэг дахиж хуваарилагдаж, шинээр дахиж товлогдоно. Гэхдээ хугацаа тодорхойгүй. Мөн нэг зүйлийг хэлэхэд, өчигдрөөс эхлээд Н.Түвшинбаярын зүгээс шүүгчид нөлөөлөх оролдлого хийсэн гэдэг мэдээлэл яваад байна. Энэ бол худлаа мэдээлэл. Шүүхийн ерөнхий зөвлөлд нөлөөллийн мэдүүлэг гаргаж өгсөн нь оролцогчидтой холбоогүй гэдгийг мэдэгдсэн. Н.Түвшинбаярын хувьд шүүхэд нөлөөлөх ямар ч оролдлого хийгээгүй. Хийх ч үгүй" гэв.

Өнөөдрийн шүүх хуралд Н.Түвшинбаяр өөрийн биеэр оролцсон төдийгүй 10 гэрчийн 9 нь мөн ирсэн байна. Н.Түвшинбаярт холбогдох хэргийн шүүх хурал өглөө 09:30 цагт Хан-Уул дүүргийн Эрүүгийн хэргийн анхан шатны шүүхэд эхэлсэн боловч ийнхүү шүүгч татгалзсаны улмаас цуцлагджээ.

Шүүгч Д.Доржсүрэнгийн хувьд Х.Баттулгын томилсон шүүгч гэгдэж байсан билээ. Гэвч тэрбээр шүүх хурлыг удирдан явуулахаас татгалзсан байна.

Бусдын амь насанд хүрсэн хэрэгт буруутгагдаад буй Олимпын аварга Н.Түвшинбаярт холбогдох хэргийг прокурорын байгууллагаас шүүхэд шилжүүлсэн. Анхан шатны шүүхээс хэргийг дахин нягтлах шаардлагатай хэмээн прокурорын байгууллагад буцаагаад байсан юм. Прокурор нягталж дуусаад өнгөрсөн гуравдугаар сарын 18-нд шүүхэд шилжүүлсэн юм. 

Хан-Уул дүүргийн прокурорын газраас Н.Түвшинбаярт холбогдуулан Эрүүгийн хуулийн тусгай ангийн 101 дүгээр зүйлийн 2 дахь хэсгийн 2.1 дэх заалтад зааснаар “Хүнийг онц харгис хэрцгийгээр алсан “, мөн хуулийн 17.8 дугаар зүйлийн 1 дэх хэсэгт заасан “Бусдын эд хөрөнгийг хууль бусаар устгасан, гэмтээсэн” зүйл ангиар яллах дүгнэлт үйлдсэн. Эрүүгийн хуулийн тусгай ангийн 101 дүгээр зүйлийн 2 дахь хэсгийн 2.1-д Хүнийг онц харгис хэрцгийгээр алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ гэж заажээ.