Баянгол дүүргийн Худалдан авах ажиллагааны албаны дарга С.Цээсүрэнг АТГ-аас энэ сарын 10-ны өдрөөс саатуулан шалгаж эхэлжээ. Хуулийн дагуу түүнийг 48 цаг саатуулах бөгөөд үргэлжлүүлэн цагдан хорих эсэх нь өнөөдөр тодорхой болох юм.

Энэ талаар албаны эх сурвалжаас тодруулахад "Саатуулан шалгаж байгаа нь үнэн. Өөр мэдээлэл өгөх боломжгүй" гэлээ. 

Мөн БГД-ийн ажилтан, албан хаагчдаас С.Цээсүрэнгийн талаар лавлахад “АТГ-аас шалгаж байгаа эсэхийг мэдэхгүй. Ямартай ч өчигдөр /2022.05.11/-нд ажилдаа ирээгүй” гэдэг мэдээллийг өглөө.

Баянгол дүүргийн хувьд тендер сонгон шалгаруулахтай холбоотой авлига, албан тушаалын хэргүүд сүүлийн үед хэвлэлээр байнга бичигдэх болсон.

Тухайлбал, “Ж.Ганбаатарын хамаарал бүхий этгээдүүд шинээр байгуулсан, "түүх"-гүй компаниудыг тендерт сонгон шалгаруулж байна. Тус дүүргийн удирдлагууд зохиомол компаниудаар дамжуулан, төсвийн мөнгийг шамшигдуулдаг боллоо” зэрэг асуудлууд сөхөгдөөд буй.

С.Цээсүрэнгийн хувьд эдгээр асуудлуудтай нэр холбогдсон гэдгийг эх сурвалж хэллээ. Харин албаны эх сурвалжийн мэдээллээр, Эрүүгийн хуулийн 22.1-д заасны дагуу хэрэг үүсгэн шалгаж байгаа гэв.

Түүний холбогдсон хэрэг нь эрх мэдэл, албан тушаалын байдлаа урвуулан ашиглах бөгөөд 1-5 жилийн ялтай зүйл анги юм. Харин улс төрд нөлөө бүхий этгээд уг хэргийг үйлдсэн бол 8 хүртэлх жилийн ялтай.

22.1 дүгээр зүйл.Эрх мэдэл, албан тушаалын байдлаа урвуулан ашиглах

1.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

2.Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

3.Энэ зүйлийн 1, 2 дахь хэсэгт заасан гэмт хэргийг улс төрд нөлөө бүхий этгээд үйлдсэн бол нийтийн албанд томилогдох эрхийг таван жилээс найман жил хүртэл хугацаагаар хасаж арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.

Ямартай ч түүнийг УИХ-ын гишүүн Ж.Ганбаатарын "хамгийн ойрын хүн" гэх мэдээлэл байна.

Бид асуудлын мөрөөр эргэн мэдээлнэ.