Засгийн газрын ээлжит хуралдаан өнөөдөр (2022.08.10) боллоо. Хуралдаанаар Засгийн газрын 2022 оны гуравдугаар сарын 9-ний өдрийн хуралдаанаас гаргасан Хөшгийн хөндийд зарим төрийн байгууллагыг шилжүүлэх тухай шийдвэрлийг хэлэлцэж, эцэслэн баталжээ. 

Энэ шийдвэрийг хэрхэн хэрэгжүүлэх талаар Барилга, хот байгуулалтын сайд Б.Мөнхбаатар "Инженерийн дэд бүтцийн эх үүсвэр, шугам сүлжээний ажлын зургийг хийж эхэлсэн. Эхний ээлжинд 498 тэрбум төгрөг төсөвлөж байгаа. Өнөөдрийн Засгийн газрын хуралдаанаар төр, засгийн зарим байгууллагыг Хөшигийн хөндий рүү шилжүүлэх асуудлыг эцэслэн баталлаа. Эхний ээлжинд 30 гаруй тэрбум төгрөгийг энэ ажилд зориулан энэ жилийн төсөвт суулгасан. Ариутга татуурга, цэвэр усны шугам сүлжээ хийх ажлыг эхлүүлнэ. Үндсэндээ бол Хөшигийн хөндийд шинэ хот байгуулах инженерийн дэд бүтцийн ажлыг энэ баасан гаригт эхлүүлнэ.

2023 оны төсөвт инженерийн дэд бүтцийн хөрөнгө оруулалтад зориулж 200 гаруй тэрбум төгрөгийн хөрөнгө оруулалтын төсөв суулгах талаар ярьж байна" гэх мэдээлэл өглөө.

Хөшигийн хөндийд 150 мянган хүн Хөшигийн хөндийд амьдрах боломжтой гэж үзэж байгаа ажээ. Хөшигийн хөндийд бүтээн байгуулах хамгийн том зүйл бол ажлын байр бөгөөд тээвэр ложистик, аялал жуулчлал, соёлын байгууллага, үйлдвэрүүд байхаар төлөвлөж байгаа юм байна. Эхний ээлжинд 35 мянган хүний амьдрах дэд бүтцийг тавих бөгөөд улсын төсөвт суусан хөрөнгө оруулалтаар цахилгаан, цэвэр ус, инженерийн дэд бүтцийн ажил хийгдэх юм байна.