Ард түмнийг шулж, өргөдөл гомдлын дээд лимитэд явдаг “Сайн электроникс”  компанийг холбогдох  хууль журмынх нь дагуу мэргэжлийн байгууллагууд нь шалгах шаардлагатай байгааг “Иргэдийн дуу хоолой” буландаа онцолж байна.

Тодруулбал, ард түмэнд онлайн түргэн шуурхай электрон барааны зээл олгодог гэх нэрээрээ танигдсан “Сайн Интернэшнл” ХХК -ийн  “Сайн электроникс”  дэлгүүр нь  ард иргэдийн итгэл дээр тоглолт хийн, дарамт үүсгэн үйлчлүүлэгчээ  хүндлэхгүй байдал нь хэрээс хэтэрчээ. 

Хүн бүрт зээл олгох боломжтой мэт сэтгэгдэл төрүүлж, бараа бүтээгдэхүүнээ суртачлахдаа иргэдийг төөрөгдүүлсэн удаа дараагийн үйлдэл гаргаж байгаад олон нийт бухимдалтай байна. Үүнд ШӨХТГ болон бусад хяналт тавих эрх бүхий мэргэжлийн байгууллагууд нь анхаарал хандуулах цаг хэдийн болсон. Гэвч “Сайн электроникс” -той холбоотой гомдлын мөрөөр нэг ч мэргэжлийн байгууллагууд ажиллахгүй байсаар өдийг хүрсэн нь хачирхалтай.

Иргэдийн дийлэнх нь “зээл гаргах боломжтой хэмээн худал хэлж хүний цаг завийг үрэн таран хийж байна,  хэд хэдэн удаа бараа бүтээгдэхүүнээ ав гэж дуудчихаад, очиход таны захиалсан бараа дуусчихсан байна гэдэг. Оочир дараалал нь хүчгэрэгдэхгүй. Хүнд сурталтай. Дотоод ажилчид нь иргэд, олон нийтэд үнэн зөв мэдээлэл өгч чаддаггүй. Байсхийгээд л зээлийн мэргэжилтэн нь солигдоно” гэх зэргээр бухимдлаа илэрхийлж байна.

Мөн хамгийн ноцтой нь “Өөр хүний паспорт ашиглаад зээл хүсэхэд өгөөд явуулчихсан байсан. Зээлээ төлж чадахгүй сар хэтрүүлсэн чинь хашаа байшинг нь хураана гэж сүрдүүлсэн” зэрэг асуудлуудыг ч иргэд цахим орчинд дэлгэжээ.