“Минт” шөнийн клубтэй холбоотой гомдол, мэдээлэл байсхийгээд гардаг ч тэгсхийгээд намждаг. Тухайлбал, ковидын үед буюу цар тахал идэвхжиж, хөл хорио эрчимжсэн өдрүүдэд  хуулийг гууль болгож  шөнийн 03.00 цаг болтол ажилласан байдаг.  Тэгвэл хамгийн сүүлд  хүнсний аюулгүй байдал, эрүүл ахуйн наад захын шаардлагыг зөрчиж хүмүүсийн уух зүйлд хэрэглэдэг мөсийг зориулалтын бусаар тээвэрлэж, зөөвөрлөж байгаа дүрс бичлэг цацагдсан. Тодруулбал, нэгэн үйлчлүүлэгчээс энэ зөрчлийн талаар манай сайтад мэдээлснийг бид уншигчдадаа сэрэмжлүүлэг болгох үүднээс хүргэсэн билээ.

Мөн уг асуудлаар НМХГ-ын холбогдох албаны хүнтэй холбогдож, тодруулга мэдээлэл хүссэн боловч “Иргэд, үйлчлүүлэгчид заавал гомдол, мэдээлэл авах 70128012 дугаарын утсанд холбогдож, хүсэлтээ уламжилж байж бид шалгадаг. Тэгэхээр уг асуудлыг одоогоор шалгаагүй байна. Хэрэв тухайн үйлчлүүлэгч мэдээллийг албан ёсоор дээрх холбогдох  утсанд хандаж өгвөл бид мэдээллийн мөрөөр шалгалт хийнэ. Гэхдээ цар тахлын үед тус шөнийн клубт арга хэмжээ авч ажилласан бөгөөд энэ талаарх мэдээллийг удахгүй өгнө”  гэх тайлбарыг өгсөн юм.

Ямартаа ч дээрх “бохир мөс”-ний асуудал  2022 оны долдугаар сарын 6-ны шөнийн 11:00 цагийн үед  болсон.  Тодруулбал, тэд үйлчлүүлэгчдийнхээ уух зүйлд хэрэглэдэг мөсийг хаа нэгэн газарт бэлтгэн, ямар ч битүүмжлэлгүйгээр тор тороор нь шал шавхай, нус цэртэй хутгалдуулан зөөж байсан нь зураг болон бичлэгт  тод буужээ. 

Хүнсий аюулгүй байдал, эрүүл ахуйн шаардлага Монгол Улс гэлтгүй дэлхий нийтэд хурцаар тавигдаж байгаа энэ үед жижиг гэж орхилгүй, энэ мэт үйлдлийг таслан зогсоох учиртай. НМХГ, МХЕГ анхааралдаа авна уу.