Оросын холбооны улсын байлдааны танк, цэргийн цуваа Монголд орж ирсэн тухай зураг, бичлэг нийгмийн сүлжээнд тавигджээ. Энэ нь иргэд, олон нийтийн дунд Монгол Улсын Үндсэн хуулийг зөрчсөн, үндэсний аюулгүй байдалдаа заналхийлж, улсын хилээр цэрэг зэвсэг оруулсан гэх хардлагыг төрүүлэв. Мөн зарим иргэд дэлхийн геополитикийн асуудал хурцадмал энэ үед ОХУ-тай хамтарсан цэргийн сургуулилт хийхийг эрс буруутгав.

Тэгвэл энэ асуудалд Гадаад харилцааны сайд Б.Батцэцэг "Бид олон оронтой батлан хамгаалах салбарынхаа хамтын ажиллагааг хөгжүүлж байгаа. Саяхан АНУ-тай хамтарсан "Хааны эрэлд" цэргийн сургуулилалтыг зохион байгуулсан. ОХУ-тай хийх гэж байгаа "Сэлэнгэ" хээрийн сургуулилалтыг жил бүр хийдэг. Хоёр тал хийхээр төлөвлөсөн ажлаа хийж байгаа нь энэ. Зэвсэг, техникийн хувьд ОХУ сургуулилалтдаа зориулж оруулж ирээд буцаагаад аваад гардаг. Жил бүр болдог төлөвлөгөөт ажил. Түүнээс биш шинээр юм зохиогоод байгаа юм биш" гэх тайлбарыг өглөө.

Нэмэлт мэдээлэл: Энэхүү цэргийн сургууль 2008 оноос анх “Дархан” нэртэйгээр эхэлж, 2011 оноос “Сэлэнгэ” нэртэйгээр үргэлжилсэн бөгөөд 15 дахь жилдээ тасралтгүй зохион байгуулагдаж байгаа аж. Цар тахлын амаргүй үед ч тасалдаагүй бөгөөд хоёр улсын цэргийн алба хаагчдын хамтын ажиллагааг хөгжүүлэхэд чухал байр суурь эзэлдэг сургууль гэдгийг салбарынхан онцолж байна.

Мөн Монгол Улсын Зэвсэгт хүчин ОХУ-ын цэргийн хамтарсан сургалт дадлага хийхийн зэрэгцээ АНУ-ын Зэвсэгт хүчинтэй хамтран “Хааны эрэлд” олон улсын энхийг дэмжих сургууль, Энэтхэг, Герман, Япон зэрэг олон оронтой “Нүүдэлчин заан”, “Бланс мэжик”, “Зам” сургалт, дадлагуудыг тасралтгүй гүйцэтгэж, цэргийн алба хаагчдынхаа ур чадвар, дадлага туршлагыг нэмэгдүүлж иржээ.