Баян-Өлгий аймгийн Засаг дарга Д.Бауыржан өнөөдөр /2022.07.25/ өглөө БНСУ-ын Чангшин их сургуулийн удирдлагуудтай цахим уулзалтыг зохион байгууллаа. Цахим уулзалтад Чангшин их сургуулийн талаас тус сургуулийн захирал Ли Уон Гун, Бодлого төлөвлөлт хариуцсан дэд захирал Юун Санг Хуан, Оюутны хөгжил, элсэлт, сургалтын газрын дарга Юун Бү Ёол, Төгсөлтийн дараах сургуулийн захирал Жонг Сан Чол, Гадаад харилцааны газрын дарга И Гил Ёон, Гадаад оюутныг дэмжих төвийн дарга Ж.Серикжан нар оролцсон бол аймгийн талаас Засаг дарга Д.Бауыржан, ИТХ-ын дарга Н.Бейбитхан, Засаг даргын орлогч С.Хонаев, ЗДТГ-ын Санхүү, төрийн сангийн хэлтсийн дарга Т.Фестиваль нар оролцов.

Уулзалтыг нээж, уулзалтад оролцогчдыг Чангшин их сургуулийн талаас Гадаад харилцааны газрын дарга И Гил Ёон, аймгийн талаас Гадаад оюутныг дэмжих төвийн дарга Ж.Серикжан танилцуулснаар цахим уулзалт эхэлсэн юм. Чангшин их сургуульд манай аймгийн нутгийн хүү Ж.Серикжан тус сургуулийн Гадаад оюутныг дэмжих төвийн даргаар ажилладаг бөгөөд Засаг дарга Д.Бауыржан болон ЗДТГ-ын газартай хамтран өнгөрсөн 05 дугаар сарын 30 хүртэл БНСУ-ын Чангшин их сургуульд ерөнхий боловсролын 12 дугаар ангийн сурагчдыг элсүүлэх ажлыг зохион байгуулсан билээ.

Цахим уулзалтаар энэ удаагийн оюутан элсүүлэх үйл ажиллагааны талаар, тэтгэлэгт хөтөлбөр хэрэгжүүлэх, цаашид тодорхой чиглэлээр хамтран ажиллах, хамтран ажиллах санамж бичиг байгуулах талаар мэдээлэл, санал солилцлоо. Бодлого төлөвлөлт хариуцсан дэд захирал Юун Санг Хуан “Аймгийн хэмжээнд анх удаа оюутан хүлээж авч байгаа, бусад гадаад улсаас ирэх оюутнуудаас танай оюутнуудыг өөр нөхцөлөөр элсүүлж байгаа байгаа бөгөөд танай аймгийн элсэгчид элсэн орсноос эхлэн төгсөх хүртэл 50 хувийн хөнгөлөлттэй суралцах боломжийг олгож байна. Аймгийн Засаг даргын санал хүсэлтийн дагуу энэ удаагийн элсэгчдийн дотуур байрын төлбөрийг 100 хувь хөнгөлсөн байгаа.” хэмээн онцолсон юм.

Харин Засаг дарга Цахим хуралд оролцсон нийт Чангшин их сургуулийн удирдлагуудад талархал илэрхийлж, энэ удаагийн Чангшин их сургуульд явуулж байгаа оюутнууд маань танай сургуулиас ихийг сураад эх орондоо ирж сайхан зүйл бүтээнэ гэдэгт итгэлтэй байна хэмээн онцолж, цаашид төрийн албан хаагчдыг чадавхжуулах зорилгоор тус сургуульд тэтгэлэгт хамруулах хүсэлтэй байгаа илэрхийлсэн юм. Цахим уулзалтыг хааж, хамтын ажиллагаанд амжилт хүсэж талууд дурсгалын зураг татуулснаар уулзалт өндөрлөв.