Хөгжлийн банкны хэргээр УИХ-ын нэр бүхий дөрвөн гишүүнийг АТГ-аас шалгаж байна. Тодруулбал, УИХ-ын гишүүн Н.Алтанхуяг, Ё.Баатарбилэг, Х.Ганхуяг, Г.Амартүвшин нарыг албан үүрэг, бүрэн эрхээ урвуулан ашиглаж нэр бүхий аж ахуйн нэгжүүдэд хууль бус давуу байдал бий болгож, зээл олгосон эрүүгийн хэрэгт холбогдуулан шалгаж байна. Тэдэнтэй ижил зүйлчлэлээр Ерөнхийлөгч асан Х.Баттулга, Худалдаа хөгжлийн банкны эзэн Д.Эрдэнэбилэг, "Эрэл"-ийн Б.Эрдэнэбат нарыг яллагдагчаар татах тогтоолыг НПГ-ын хяналтын прокурор гаргасан аж.

Одоогоор нийт 79 хүнд холбогдуулан эрүүгийн хэрэг үүсгэж, яллагдагчаар татан, мөрдөн шалгах ажиллагааг явуулж байгаа гэж АТГ-аас мэдээллээ. 

"Хөгжлийн банкны" гэх хэргийн улмаас учирсан хохирлын хэмжээ 2 их наяд 383 тэрбум 7 сая 436 мянга 94 төгрөгөөр тооцогдож байгаа юм байна.

Үүнээс АТГ-аас мөрдөн байцаалтын явцад Хөгжлийн банкны зээлийн эргэн төлөлтийн 494 тэрбум 771 сая 320 мянга 450 төгрөгийн хохирлыг нөхөн төлүүлжээ. Энэ бол 2022 оны долоодугаар сарын 18-ны өдрийн байдлаарх тоон мэдээлэл юм. Өөрөөр хэлбэл, 494 тэрбум төгрөг нь зөвхөн мөрдөн байцаалтын шатанд нөхөн төлөгдөж байгаа дүн билээ. Энэ тоо цаашид нэмэгдэж, өөрчлөгдөнө гэдгийг АТГ-аас сануулав.