Улсын баяр наадмын бөхийн барилдааны үеэр “Начны найраа” хийхээр утас цохиж буй аймгийн орлогчийн бичлэг цацагдаж, олныг гайхшруулсан. Тодруулбал, Өмнөговь аймгийн Засаг даргын орлогч Н.Энхбат Улсын заан Н.Жаргалбаяр руу "Өмнөговь аймгийн Засаг даргын орлогч Н.Энхбат байна. Манай аймгийн арслан Э.Нямааг авчих. Тоогоо хэл" гэсэн яриа олон нийтийн сүлжээнд тархаад байв.

Харин үүнийг Н.Энхбат эрс үгүйсгэж, Н.Жаргалбаярт мөнгө амлаагүй, утсаар яриагүй гэсэн байдаг. Мөн улсын заан Н.Жаргалбаяр ч шалгаагүй гэж, мэдээллийг үгүйсгэж байв.

Тэгвэл Н.Жаргалбаярын "найрааны" гэх асуудлыг шалгаж өгөхийг нэгэн иргэнээс бичгээр АТГ-т хандсан байна. Тиймээс АТГ-аас хавтаст хэрэг нээж, өнөөдөр холбогдох хүмүүсийг нь дуудаж, тайлбар мэдүүлэг авчээ. 

Хэрэв Н.Жаргалбаяр хахуул өгч, давсан нь нотлогдвол Үндэсний баяр наадмын тухай хуулиар түүний тавын давааг хүчингүй болгох юм. Харин хахуул өгөхийг завдсан гэх Өмнөговь аймгийн Засаг даргын орлогч Н.Энхбатад хуулийн хариуцлага ногдуулах зохицуулалттай юм байна.  

Нэхэн сануулахад, “Начны найраа”-гаа утсаар наймаалцаж буй энэ бичлэгийн дараа буюу тавын давааны ам авах үед Улсын заан Н.Жаргалбаяр 20-30 минут орчим бодсоны эцэст Өмнөговь аймгийн Ноён сумын харьяат, аймгийн арслан Э.Нямааг амлан авсан байдаг. Улмаар барилдаанд аймгийн арслан Э.Нямаа улсын заан Г.Жаргалбаяраар тав давж, начин цолны болзол хангасан билээ.

БИЧЛЭГ