Хоёр байлдагч барилдаж байгаад, нэг нь хүнд гэмтэл авсан хэрэг гарсан. Тодруулбал, өнгөрсөн тавдугаар сард Говь-Алтай аймгийн Алтай суманд байрлах хилийн 0214 дүгээр ангийн байлдагч А.Алтангэрэл, мөн тус ангийн байлдагч н.Дагвадоржтой барилдаж байгаад нуруу, нугасны хүнд гэмтэл авсан байна.

Одоогоор гэмтсэн 19 настай байлдагч ТТАХНЭ-т хэвтэн эмчлүүлж байгаа ажээ. Энэ талаар ХХЕГ болон ТТХНЭ-ийн удирдлагуудаас тодруулга авлаа.

ТТАХНЭ-ийн Гэмтлийн тасгийн эмч Б.Баттөмөр "Алтай сумын ЭМТ-ийн эмч биеийн байдлыг нь үзээд ил шарх гэмтэл байхгүй, хүзүү хэсгээрээ хавдаж гэмтсэн учраас аймгийн төв руу явуулах чиглэл өгснөөр шат шатны эрүүл мэндийн байгууллагын эмч нарын заавар зөвлөгөөний дагуу автомашинаар тээвэрлэн долоодугаар сарын 5-ны 22 цагийн үед ГССҮТөвд авчирсан байна. Хүзүүний 5, 6-р нугалам хоорондох нугас дарагдсан оношлогоогоор долоодугаар сарын 28-ны өдөр мэс засал хийсэн. Яаралтай эмчилгээ хийж, арга хэмжээ авсан учраас эмчлүүлэгч маань одоо хоёр хөл дээрээ бүрэн боссон. Цаашид мэс заслын дараах эдгэрэлт явагдахад хугацаа шаардагдах хэдий ч 100 хувь эдгэрч, амьдралын чадавхи нь бүрэн сэргэх боломжтой" гэв.

ХХЕГ-ын Цэргийн албаны хэлтсийн дарга, хурандаа А.Ууганбилэг "Цэргийн бүх албан хаагч Зэвсэгт хүчний бие бүрэлдэхүүний нэг хэсэг учраас нэг нь гэмтсэн, нөгөө нь гэмтээсэн гэхээс илүүтэй байлдагчийн эрүүл мэндийн байдалд анхаарч байна. Гэмтсэн байлдагч А.Алтангэрэлийн аавын гомдлын дагуу хэргийг шалгаж байгаа. Хууль хяналтын байгууллагын дүгнэлт гарсны дараа хариуцлага хүлээхэд бэлэн" хэмээсэн юм.