Фэнгшүй, Үйлдвэрчний эвлэлийн ерөнхийлөгч, Эрс шинэчлэл хөдөлгөөн, Үндэсний соёмбо хөдөлгөөний тэргүүн, УИХ-ын гишүүн,  УИХ-ын даргын нийгэм, эдийн засгийн бодлогын орон тооны бус зөвлөх, ерөнхийлөгчийн сонгуульд хүчтэй өрсөлдөөн үзүүлэгч, Оюу толгойг эсэргүүцэгч С.Ганбаатар.

2000 оны эхээр монголчууд бид гэнэт ийм нэгэн нийгмийн зүтгэлтэн, улс төрийн тоглогчтой болсон. Хөгшин европоос эрдэм өвөрлөж ирсэн хэмээн боловсролтой, оюунлаг элитийн дүрээр хэвлэлийн дүр болж байсан үедээ эртний хятадын мухар сүсгийн шүтлэгийн эд өлгийн зүйлс болох зоос зуусан мэлхийний дүрс тэргүүтнийг заран мөнгө олохын хажуугаар нэгэнт харанхуй бүдүүлэг болон ухарч байсан нийгмийн сэтгэлгээг улам самууруулж байлаа. Эндээс С.Ганбаатарын нийгмийн сул талыг олж харах авьяас тод томруун харагддаг. Гэвч эртний түүх соёлт Монголын ард түмэн язгуур чанараараа түүний фэнгшүйд хэт удаан автаагүй. Түүнд дараагийн сэдэв хэрэг болсон.

Монголын нийгэмд сэдэв шиг элбэг юм байгаагүй үе. Ингээд л хөвөрч өгсөн дөө. Түүний барьж авсан сэдэв нийгмийн анхааралд ордог нэг давуу чанар байдаг хэдий ч бодит байдал дээр ахиц гардаггүй нэгэн хорлонт шинж байдаг. Цаг үеийн зуурдын сэдвээр чадварлаг тоглон хувь рейтингээ ахиулж чаддаг. Харин түүний тодорсон нийгмийн асуудал бахь байдаг байрандаа үлддэг.

Үр дүн нь С.Ганбаатар шударга гэдэг олон нийтийн гүн бат итгэл үнэмшил. Түүнийг тэргүүлэх рейтингтэй улстөрч болгон бойжуулсан гол сэдэв бол Оюу төсөл. Тэр шүүмжилсэн, харин төсөл явдгаараа явсан. Монгол Улсын эрдэс баялгийн олборлолтын хамгийн том энэ төсөл макро эдийн үзүүлэлтийг сайжруулсан хэдий ч монголчуудын ахуй амьдралын хүнд хүчрийг нимгэлээгүй. Харин ч нийгмийн ялгарлыг улам дэвэргэгч баялгийн зүй бус хуваарилалтын бас нэгэн сүлжээ болсон. Үүнд нийгмийн олонхи сэтгэл дундуур байгааг боломж болгож харсан пиарын авьяаслаг технологич болохыг түүний улс төрийн замнал харуулдаг

Дубайн гэрээ, Эрдэнэтийн 49 хувь гэх мэт шүүмжлэгдсэн төсөл, гэрээнүүд явдгаараа явсан, шүүмжилсэн улстөрч олон сонгуульд гялалзсан амжилтуудыг үзүүлдгээрээ үзүүлсэн. Чоно цатгалан, хонь бүрэн он жилүүд үргэлжилсэн. Англид удирдахуйн ухаанаар номд нэвчиж, фэнгшүй гэх эд зүйлийн шашин дэлгэрүүлж, иргэний нийгмийн зүтгэлтний дүрд ч хувилж, ямар ч юм бэ, ид шидээр Монголын үйлдвэрчний эвлэлийг ч авч явсаар тэргүүлэх рейтингтэй улстөрчдийн жагсаалтад орж ирсэн. Ерөнхийлөгчийн сонгуульд хүчтэй өрсөлдөөн үзүүлсэн топ улстөрч. Улс төрийн замнал нь харин нам, иргэний хөдөлгөөний маапаан арвин бий.  Гэхдээ тэр нам, бүлэглэлүүдийн зүй бус улс төрөөс дайжсан мэт дүр эсгэн олон нийтийн дэмжлэг хэзээд түүн рүү ашигтайгаар эргэхэд бэлэн тийм байрлалыг эзлэн, отон тоглолт хийдэг хувийн арга барилтай.

Энэ авьяаслаг тоглогч зэсээ цухуйлгаж, цаад үнэн мөн чанараа таниулсан алдаа гаргасан нь 2023 оны зургаадугаар сард Л.Оюун-Эрдэнийн Засгийн газраас  оруулж ирсэн Газрын ерөнхий хуулийн төслийг дуу алдан дэмжсэн явдал байлаа. дэмжигчид нь гайхаж цочирдсоноо нийгмийн сүлжээнд хэлэлцэж байв. Тэр Газрын Ерөнхий хуулийн нэмэлтээр бэлчээрийг хумих бодлогыг улайм цайм оруулж ирсэн юм.

УИХ-ын чуулганд түүний хэлсэн "Бэлчээрийн МАА одоо явахаа больсон. Бид хүссэн хүсээгүй эрчимжсэн, хагас эрчимжсэн фермерийн аж ахуй руу явахаас аргагүй" гэсэн үгс түүний хэн болохыг хэлж өглөө. Харин бэлчээр хумих бодлогын үзэл санаатай энэ төсөл тухайн үедээ олон нийтийн хүчтэй эсэргүүцэлтэй тулгарч УИХ хэлэлцэхээс бултан хойшлуулсан. С.ГАНБААТАР ч чимээгүйхэн энэ сэдвээс бас л чимээгүйхэн бултсан.

Тэр Монгол төрийн тогтнолын орон зай нүүдлийн соёлын газрын харилцааны онцлог, энэ соёлын тэсч үлдэх сүүлчийн цайз бэлчээрт олон жилийн турш өширхөж явдгаа сэтгэл хөдлөн өгүүлж байсан бичлэг интернэтээр цацагдсан.

Их гүрнүүдийн бодлого жижиг улсын бодлогод нөлөөлдөг олон янзын арга байдаг. Олон нийтэд нь хандсан суртал ухуулгаас эхлээд өөрийн талын хүмүүсийг улс төрд нь шургуулах хүртэл...  Гэхдээ колоничлолын бодлогын асар их туршлагатай гадаад ертөнц төрт ёсны эртний уламжлалтай Монголыг тийм амар обьект биш гэдгийг тооцож чаддаг байна. Ази, африк, латин америкийн орнууд шиг амар хоол биш гэдгийг ойлгодог болох нь С.Ганбаатарын огцом хувирлаас харагдав. 

Харийнхан Монголын улс төрөөс хөрөнгө мөнгөөр тэтгэсэн ахмад үеийнхэн, боловсрол, нийгэмшлээр нь элсүүлсэн шинэ үеийнхнээ манай дотоод улс төрийн өрсөлдөөнд байнгын амжилт үзүүлнэ гэдэгт итгэдэггүй бөгөөд төлөвлөгөөнд нь эрсдэл үүссэн үед ашиглах нөөц шугам, сэлгээний тоглогчдыг бэлэн байдалд байлгаж байдаг. Тийм сэлгээний тоглогчдын нэг нь С.Ганбаатар болохыг Газрын хуулийн хэлэлцүүлгээс харагдлаа. Ийм өндөр түвшинд бэлтгэсэн тоглогчоо хамаг имижийг нь эвдэн гаргаж ирсэн нь Газрын шинэтгэлд харийн сонирхол ямар их хүч хаяж байгаагаас харж болно.

Монголд иргэний нийгмийн олон байгууллага гадаадаас санхүүжин үйл ажиллагаа явуулдаг. Нийгмийн том орон зай. Энэ орон зайд ч тэр нөөц шугам бэлэн лугшиж байгааг бид ойлгох хэрэгтэй. Өнөөдөр бид Монгол Улсаа өнгөт хувьсгалын давалгаа, дайрлаганаас тэсч үлдсэн гэж боддог. Харин өнгөт хувьсгалын үргэлжилсэн өрнөлд амьдарч буйгаа мэдэхгүй байна. 

Монголын нийгэмд эрс эргэлт шаардсан үндэсний хөдөлгөөн идэвхжин өрнөх нөхцөл байдал нэгэнт бий болсон. Энэ бол Монголыг чиглэсэн харийн бодлогын хувьд маш том эрсдэл. Ийм эрсдэлийн үед л тэд энэхүү нөөц шугам, сэлгээний тоглогчдоо талбайд гаргаж үндэсний хөдөлгөөнийг өнгөт хувьсгал болгон хувиргах технологио хэрэгжүүлэхээр отож байдаг. Ийм цаг үед монгол төрийн түшээдийн эгнээнээс С.Ганбаатараар тогтохгүй өөр олон түшээдийг шахан зайлуулах зайлшгүй шаардлага байгаа билээ.