Уул уурхайн яам урдаа аж үйлдвэржилт гэх тодотгол нэмээд л өөрчлөлтийг өөрөөсөө гэдэг шиг арвин их итгэл найдвар байсан юмсан. АМНАТ-аа  арга билгийн ухаанаар аятайхан шударга авдаг болж, ард түмэндээ стратегийн ордын ашиг шимийг хүртээдэг болох нь гэх горьдлого,  хүлээлт цонхны цаанаас мөс долоолгох шоглоом болж таарах юм шиг байна. Олборлогчоос үйлдвэрлэгч улс болж, байгалийн баялагтаа нэмүү өртөг шингээж үйлдвэрлэдэг, байгаль орчинд ээлтэй байх үндсэн зарчмыг баримталдаг болох нь гэж итгэсэн юмсан. Итгэл МАНАН мэт замхрах бололтой болчихлоо. Ийн хардах үндэслэл байна, цаана чинь...

Намрын чуулган эхлэнгүүт Ашигт малтмалын тухай хуулийн шинэчмилсэн найруулга нэмэлт өөрчлөлтийг хэлэлцүүлэхээр Аж үйлдвэр, эрдэс баялгийн яам айхтар өргөн баг бүрэлдэхүүнтэйгээр ажиллаж байгаа гэх мэдээлэл бий. Тэгэх нь ээ уг шинэчилсэн, шинэчлэгдэж буй хуулийн төсөлтэй зэрэгцэн олон улсад стратегийн орд гэдэг ойлголт байхгүй.  Гагцхүү стратегийн нөөц гэж л бий. Тэр ч утгаараа  34, 51 хувь авна гэхээсээ илүүтэй 20 байсан ч 50+1 буюу дийлэнх нь ард түмний амьдралд нөлөөлөхүйц  байна гэсэн зарчмыг чухалчилна.

Зөвхөн хувь эзэмшсэнээрээ асуудал шийдэгдэхгүй гэсэн үг шүү дээ. Товчхондоо дийлэнх өгөөж нь ард түмний талд байна. Нөгөө талдаа хөрөнгө оруулагч, бизнес эрхлэгчдэд тодорхой болгоё.

Стратегийн орд гэдэг зүйлийг тодорхой болгож, хөрөнгө оруулагчдад ч ойлгомжтой, ард иргэдэд хүртэх өгөөж нь тодорхой ойлгомжтой болгоно. Үндсэн хуульд заагдсан “Байгалийн баялаг бүх ард түмний өмч байх...” гэдэг үндсэн зарчмыг хангуулахын тулд хэн нэгний хувийн өмчийг авах гэхээсээ илүүтэй байгалийн баялгаас хүртэх үр өгөөж нь иргэддээ шууд наалддаг байх чиглэлд анхаарч, “Баялгийн сангийн тухай хууль”-д өөрчлөлт оруулж, уг хуулийг бодитойгоор амьдралд хэрэгждэг, том ордуудын үр өгөөж, хүмүүсийн амьдралын чанарт нөлөөлдөг болгоно гэх мессежийг Засгийн газрын зүгээс түгээх боллоо. Тэдний мэдээллийн түгээлтээс харахад Монголын Төр Монголын баялаг буюу стратегийн ордуудынхаа хувь эзэмшлийг авахгүй нь байхаар шийдэж байгаа бололтой.